Ամերիկացի դիվանագետը հայ-ադրբեջանկան հարցով առաջին անգամ կայցելի Հայաստան և Բաքու. Նեդ Փրայս
Կովկասյան բանակցային գծով ավագ խորհրդական Լուիս Բոնոն հաջորդ շաբաթ կմեկնի տարածաշրջան այս պաշտոնում իր առաջին այցով, հայտարարել է ԱՄՆ Պետդեպարտամենտի պաշտոնական ներկայացուցիչ Նեդ Փրայսը։
«Մենք ակնկալում ենք, որ դրանք կլինեն կանոնավոր ուղևորություններ դեպի Հարավային Կովկասի բոլոր երեք երկրներ: Բոնոն նախատեսում է հանդիպել բարձրաստիճան ղեկավարների հետ՝ աջակցելու Հայաստանի և Ադրբեջանի միջև խաղաղ գործընթացին: Իր այցի շրջանակում նա կայցելի Հարավային Կովկասի բոլոր երեք երկրներ: Նա կմեկնի և՛ Բաքու, և՛ Երևան, և՛ Թբիլիսի այս հերթականությամբ», - ասել է Փրայսը։
Նրա խոսքով՝ դա Բոնոյին հնարավորություն կտա զարգացնել ԱՄՆ պետքարտուղարի, Հայաստանի վարչապետի և Ադրբեջանի նախագահի հանդիպման արդյունքները, որը տեղի է ունեցել փետրվարի կեսերին Մյունխենի Անվտանգության համաժողովի շրջանակում։
«Մենք, ինչպես նշվեց այս եռակողմ ներգրավվածության ավարտին, ոգևորված ենք Հայաստանի և Ադրբեջանի վերջին ջանքերով՝ արդյունավետորեն մասնակցելու խաղաղության գործընթացին: Եվ Բոնոն օգնում է՝ նա հույս ունի, որ կարող է զարգացնել այդ ջանքերը և տեսնել, որ այս առաջընթացը կշարունակվի: Այս բոլոր երեք քաղաքներում Բոնոն կընդգծի, որ Միացյալ Նահանգները հավատարիմ է Հարավային Կովկասի տարածաշրջանի խաղաղ, ժողովրդավարական և բարգավաճ ապագան ապահովելուն», - ասել է Պետդեպարտամենտի խոսնակը:
