Թուրքիայի երկրաշարժերը հանգեցրել են երկրում հանգստի պահանջարկի անկմանը
Երկրաշարժերը Թուրքիայում հանգեցրել են այնտեղ արձակուրդներն անցկացնելու պահանջարկի անկմանը։ Սակայն մինչև ամառային սեզոնը Ռուսաստանի Դաշնությունից զբոսաշրջիկների հոսքը կվերականգնվի։ Այս մասին հայտնում է «Известия»-ն:
«Իհարկե, զբոսաշրջության ոլորտում որոշակի անկում կա։ Չնայած Թուրքիայում ռուսների սիրելի հանգստավայրերը, ընդհանուր առմամբ, չեն տուժել։ Կարծում եմ, որ Ռուսաստանի Դաշնության քաղաքացիների ընտանեկան հանգստի ավանդական տուրիստական հոսքը, անշուշտ, մինչև ամառ կվերականգնի իր դիրքերը», – ասել է ռուս-թուրքական գործարար խորհրդի (RTBC) տնօրեն Ալեքսեյ Էգարմինը։
Հիշեցնենք, որ փետրվարի 6-ին Թուրքիայում տեղի է ունեցել 7,7 և 7,6 մագնիտուդ ուժգնությամբ երկու հզոր երկրաշարժ։ Աղետի գոտում են հայտնվել երկրի 11 նահանգներ և Սիրիայի հյուսիսային շրջանները։ Վերջին տվյալների համաձայն` աղետի զոհերի թիվը գերազանցել է 50 հազարը:
