Թուրքիայի նախագահ Ռեջեփ Թայիփ Էրդողանը Անկարայում իշխող «Արդարություն և զարգացում» կուսակցության խորհրդարանական խմբակցության նիստում ելույթի ժամանակ հայտարարել է, որ Թուրքիայում նախագահական և խորհրդարանական ընտրությունները տեղի կունենան մայիսի 14-ին։ Այս մասին հայտնում է ТАСС-ը։
 

«Մայիսի 14-ին մեր ժողովուրդը կանի այն, ինչ պահանջվում է՝ կքվեարկի ընտրություններին»,- ասել է Թուրքիայի նախագահը։

Ավելի վաղ նշվել էր, որ փետրվարին երկրում տեղի ունեցած ավերիչ երկրաշարժերի պատճառով ընտրությունները կարող են հետաձգվել։
 

Թուրքիայի նախագահը նաև իր ելույթի ժամանակ նշել է, որ փետրվարի 6-ի ցնցումներից հետո Թուրքիայում ավելի քան 11400 հետցնցում է գրանցվել, հայտնում է Anadolu գործակալությունը։ Բնական աղետն անմիջական ազդեցություն է ունեցել Թուրքիայի 14 միլիոն քաղաքացիների վրա։ Եղանակը նույնպես վատացրել է իրավիճակը։ Թուրքիայից և այլ երկրներից որոնողափրկարարական աշխատանքներին մասնակցել է 35000 մասնագետ, ընդհանուր առմամբ աղետի գոտում ներգրավվել է 271000 մարդ։

Բացի այդ, Էրդողանը հայտնել է, որ տուժած նահանգների մոտ 2,5 միլիոն բնակիչ օրական երեք տաք սնունդ է ստանում։ Նրա խոսքով, մոտ ապագայում կսկսվի թաղամասերի լայնածավալ վերականգնումը։ Ընդհանուր առմամբ նախատեսվում է կառուցել ավելի քան 468 հազար տուն, մոտ օրերս կսկսվի 21 հազար տան շինարարությունը։

Թուրքիայի ղեկավարը հայտարարել է աղետների վերականգնման հիմնադրամ ստեղծելու մասին։ Բացի այդ, Թուրքիայի կառավարությունը մտադիր է մշակել աղետների արձագանքման «Թուրքիայի ազգային ռիսկի վահան» մոդելը։ Բացի այդ, Թուրքիայի իշխանությունները կշարունակեն միջոցներ ձեռնարկել աղետից տուժած շրջանների տնտեսությունը խթանելու համար։