ՏԵՍԱՆՅՈՒԹ․ Խիստ պատժամիջոցներ կիրառել Ադրբեջանի դեմ․ Ադամ Շիֆի պահանջը

Կոնգրեսական Ադամ Շիֆը պահանջում է խիստ պատժամիջոցներ կիրառել Ադրբեջանի դեմ` այդ թվում զրկել վերջինիս ամերիկյան ամենամյա օգնությունից: Այս մասին գրում է «Ամերիկայի Ձայնը»։

Ադամ Շիֆը ողջունում է Հայաստանի ցուցաբերած մարդասիրական օգնությունը Թուրքիային։

Հիշեցնենք, որ 2022 թ․ դեկտեմբերի 12-ին ադրբեջանական իշխանությունները, կոպտորեն խախտելով 2020 թ․ նոյեմբերի 9-ի եռակողմ հայտարարության դրույթները, արգելափակել են Արցախը Հայաստանի և արտաքին աշխարհի հետ կապող Լաչինի միջանցքը։ Արդյունքում հանրապետությունում օրեցօր սրվում է առաջին անհրաժեշտության ապրանքների, դեղորայքի, պարենի և վառելիքի պակասը։

Շրջափակման կործանարար ազդեցությունը խորացնելու նպատակով Ադրբեջանը պարբերաբար փակում է իր կողմից օկուպացված տարածքներով Հայաստանից Արցախ հասնող գազի մատակարարումը։ 

«Արցախի շրջափակումը 2020 թ․ Թուրքիայի և Մերձավոր Արևելքից ահաբեկչական կազմակերպությունների անմիջական մասնակցությամբ Ադրբեջանի կողմից Արցախի Հանրապետության և նրա ժողովրդի դեմ սանձազերծված ռազմական ագրեսիայի ուղղակի շարունակությունն է։ Չկարողանալով Արցախի ժողովրդին իր հայրենիքից վտարել ռազմական ճանապարհով՝ Ադրբեջանը զինադադարի հաստատումից ի վեր, ավելի քան երկու տարի, հետևողական փորձեր է ձեռնարկում քիչ ակնհայտ, բայց ոչ պակաս անմարդկային մեթոդներով իր հանցավոր նպատակներին հասնելու համար», - նշվում է հունվարի 12-ին Արցախի ԱԳՆ-ի կողմից տարածված հայտարարությունո։