Մենք չենք ծրագրել հարձակում Ռուսաստանի դեմ. Բայդեն

ԱՄՆ-ը և արևմտյան մյուս երկրները չեն ձգտում վերահսկողության տակ առնել Ռուսաստանի Դաշնությունը և չեն ծրագրել հարձակում նրա դեմ, ասել է ԱՄՆ նախագահ Ջո Բայդենը Վարշավայում ունեցած ելույթում։

Բայդենը երեքշաբթի օրը՝ փետրվարի 22-ին, ելույթ է ունեցել Լեհաստանի մայրաքաղաքի կենտրոնում։  Այսօր ավարտվում է նրա այցը Լեհաստան։

Միևնույն ժամանակ, Բայդենը վերահաստատել է ՆԱՏՕ-ի կանոնադրության 5-րդ հոդվածի անձեռնմխելիությունը, որը ենթադրում է, որ հարձակումը դաշինքի որևէ երկրի վրա նշանակում է հարձակում ամբողջ դաշինքի վրա։

«Եվ թող ոչ ոք չկասկածի, որ ՆԱՏՕ-ի կանոնադրության 5-րդ հոդվածը մնում է անդրդվելի: Եվ թող դա գիտակցի ՆԱՏՕ-ի յուրաքանչյուր անդամ՝ հարձակում մեկի վրա նշանակում է հարձակում բոլորի վրա, և դա սուրբ պարտավորություն է ՆԱՏՕ-ի տարածքում»,- ասել է նա:

Ավելի վաղ ՌԴ նախագահ Վլադիմիր Պուտինը հայտարարել էր, որ Ռուսաստանը պատշաճ կերպով կպատասխանի Ուկրաինայի տեղական հակամարտությունը գլոբալ առճակատման վերածելու ծրագրերին, և որ անհնար է Ռուսաստանին հաղթել մարտի դաշտում։ 

 «Արևմուտքի վերնախավերը չեն թաքցնում իրենց նպատակը՝ Ռուսաստանին հասցնել, ինչպես ասում են, սա ուղիղ խոսք է, Ռուսաստանի ռազմավարական պարտության, սա ի՞նչ է նշանակում, ի՞նչ է մեզ համար, նշանակում է՝ վերջ տալ մեզ։ ... նրանք մտադիր են լոկալ հակամարտությունը վերածել գլոբալ առճակատման փուլի, մենք այսպես ենք հասկանում այս ամենը և համապատասխանաբար կարձագանքենք»,- ասել է Պուտինը՝ ելույթ ունենալով Ռուսաստանի Դաշնության Դաշնային ժողովում։