Հայաստանում ԵՄ առաքելությունը չի նպաստում տարածաշրջանի կայունացմանը․ ՌԴ ԱԳՆ

Հայաստանում առաքելություն ծավալելու ԵՄ որոշումը չի նպաստում Անդրկովկասում կայունացմանը: Այս մասին հայտնել է Ռուսաստանի փոխարտգործնախարար Միխայիլ Գալուզինը Հարավային Կովկասի հարցերով ԵՄ հատուկ ներկայացուցիչ Տոյվո Կլաարի հետ հեռախոսազրույցի ընթացքում։ 

«Հայ-ադրբեջանական հարաբերությունների կարգավորման թեման քննարկելիս Մ. Յու. Գալուզինը նշել է, որ Հայաստանում այսպես կոչված ԵՄ քաղաքացիական առաքելություն ծավալելու մասին Բրյուսելի որոշումը հստակ աշխարհաքաղաքական ենթատեքստ ունի, որը չի նպաստում Անդրկովկասում իրական կայունացմանը։ Ընդգծվել է Բաքվի և Երևանի միջև այս նախաձեռնության շուրջ կոնսենսուսի բացակայությունը», – նշվում է ՌԴ ԱԳՆ հաղորդագրության մեջ։ 

Ավելի վաղ Ռուսաստանի ԱԳՆ պաշտոնական ներկայացուցիչ Մարիա Զախարովան, մեկնաբանելով Հայաստանում առաքելության աշխատանքի մեկնարկը, հայտարարել էր, որ «ամեն ինչ արվում է, որ Ռուսաստանը դուրս մղվի տարածաշրջանից և թուլացվի նրա պատմական դերը՝ որպես անվտանգության գլխավոր երաշխավորի»: 

Ավելի վաղ ԵՄ խորհուրդը հայտնել էր փետրվարի 20-ին Հայաստանում ԵՄ քաղաքացիական առաքելության (EUMA) գործարկման մասին՝ դաշինքի անվտանգության և պաշտպանության ընդհանուր քաղաքականության շրջանակներում: ԵՄ խորհուրդը հունվարի 23-ին հայտնել է Հայաստանի սահմանամերձ շրջաններ երկու տարի ժամկետով քաղաքացիական առաքելություն ուղարկելու որոշման մասին: Հայաստանում ԵՄ առաքելությունը (EUMA Armenia) կներառի մինչև 100 աշխատակից, ներառյալ մոտ 50 անզեն դիտորդ: