Շատ ծանր վիճակ է հայության համար Հալեպում. 24News
Սիրիայում երկրաշարժից հետո անօթևան մնացած հայերը, որոնք դեռևս զգուշանում են վերադառնալ իրենց բնակարանները, շարունակում են ապաստանել տեղի հայկական կենտրոններում, այս մասին 24News-ին ասել է Հալեպի «Ռադիո երազ» կայանի տնօրեն Ռուբեն Գևորգյանը։
«Ստեղծված հանձնախումբ կա, որի ուսումնասիրության հիման վրա հարցերն արժևորվում են և դրանց համապատասխան՝ որոշվում է անել անհրաժեշտը, որ առաջնահերթ օժանդակութունները տրամադրվեն։ Շատ ծանր վիճակ է հայության համար»-նշել է նա։
Ըստ «Ռադիո երազ» կայանի տնօրենի՝ հայության շրջանում հնարավոր նոր զոհերի մասին տվյալներ չկան․ «4 վիրավոր հիվանդնոցային վիճակի մեջ է։ Եթե մանր-մունր բաներ կան, մենք տեղեկացված չենք։ Ժողովուրդը հավաքվում, ամեն ինչ խոսում է, այս է վիճակը»։
Ռուբեն Գևորգյանը նշել է, որ Սիրիան մինչև երկրաշարժն էլ, երբ պատժամիջոցների տակ էր, դեղորայքի, երեխաների սննդի, կաթի պակասը կար։
«Դեռ ահազանգային չէ վիճակը, դեռ ինչ-որ բան ապահովվում է։ Շատ պետություններ իրենց օժանդակությունն ուղարկել են, ներառյալ՝ Հայաստանը։ Դեռևս հնարավոր է լինում ապահովել դեղորայքով, այլ բաների խնդիրը լուծել, բայց այս պայմաններում ամեն ինչ ավելի թանկ է, ավեկի դժվար է։
Այսօր 1 տարեկանը չլրացած երեխաների կաթնամթերքի հետ կապված կարող է լուրջ խնդիր առաջանալ։ Երկրորդը՝ քրոնիկ հիվանդությունների համար է պետք ապահովել դեղորայք։ Ճնշումի հետ կապված հատուկ դեղեր են հարկավոր։ Ճնշման, շաքարախտի գործիքների հարցով ներկրողներին ենք դիմում»,- ասել է «Ռադիո երազ»-ի տնօրենը։
