Ռուսաստանը մշտական կարգով արգելում է 77 ամերիկացիների մուտքը Դաշնություն

Ըստ ՌԴ ԱԳՆ  հաղորդագրության`  «ի պատասխան Վաշինգտոնի կողմից ռուսաստանցիների նկատմամբ պատժամիջոցների ցանկի ընդարձակման, Ռուսաստանը մշտական կարգով արգելում է 77 ամերիկացիների մուտքը Դաշնություն»:

Այդ ցանկում են ոչ միայն ամերիկացի պետական և քաղաքական գործիչներ, այլև նրանց ընտանիքների անդամները:

Նշվում է, որ պատժամիջոցների են ենթարկվել, մասնավորապես, Վաշինգտոնի, Նյու Մեքսիկոյի նահանգապետերը, Կենտուկի նահանգի նահանգապետի դուստրը, Կալիֆորնիայի նահանգապետի կինը և այլ անձինք:

«Եվս մեկ անգամ կրկնում ենք, որ Մոսկվայի նկատմամբ Վաշինգտոնի սանկցիաները բումերանգի վերադարձի օրենքով կհարվածեն ԱՄՆ-ին»,- ասվում է ՌԴ ԱԳՆ հայտարարությունում:

ՌԴ ԱԳՆ-ի տվյալներով՝ ներկայումս Ռուսաստանի «սեւ ցուցակում» ԱՄՆ 1344 քաղաքացի կա։

Միացյալ Նահանգները հետևողականորեն պատժամիջոցներ է սահմանում ռուս ֆիզիկական և իրավաբանական անձանց նկատմամբ, որոնք ներգրավված են Ուկրաինայի դեմ ռուսական ագրեսիայի մեջ։ Վերջիններիս թվում բացահայտվեց 10 ֆիզիկական և 12 իրավաբանական անձանցից բաղկացած ցանցը, որն օգնեց Ռուսաստանին պահպանել ռազմարդյունաբերական համալիրը՝ պատժամիջոցները շրջանցելով, և սահմանափակումներ մտցրեց այդ անձանց նկատմամբ։