ՏԵՍԱՆՅՈՒԹ. Հրապարակվել են չինական հետախուզական աերոստատի խոցման կադրերը. Չինաստանից արձագանքել են
Չինաստանը բողոք է հղել ԱՄՆ-ին՝ իրեն պատկանող աերոստատի ոչնչացման համար։ Այս մասին հայտնում են միջազգային լրատվականները:
Չինաստանի արտաքին գործերի նախարարությունը հայտարարել է, որ սարքավորումը եղել է քաղաքացիական, և որ Պեկինը «իրավունք կվերապահի իրեն հետագա անհրաժեշտ արձագանքի և վճռականորեն կպաշտպանի իր օրինական իրավունքներն ու շահերը»:
Պենտագոնի ղեկավար Լլոյդ Օսթինը հայտարարել է, որ Չինական խոցված օդապարիկը օգտագործվում էր ԱՄՆ ռազմավարական թիրախները լրտեսելու համար:
ԱՄՆ զինվորականները չինական օդապարիկը խոցել են օգտագործելով F-22 կործանիչից արձակված AIM-9X հրթիռը։ Ոչնչացված օբյեկտը Երկրորդ համաշխարհային պատերազմից հետո առաջին օտարերկրյա մարմինն էր, որը ԱՄՆ-ն խոցեց իր տարածքում:
ԱՄՆ-ը կարծում է, որ կա չինական երրորդ հետախուզական օդապարիկ։ Կոլումբիայի ռազմաօդային ուժերը հայտնել են, որ այն նկատել են իրենց տարածքում փետրվարի 2-ին:
Պենտագոնից հայտնում են, որ շարունակում են խոցված սարքի բեկորների հավաքման աշխատանքները:
