Գերմանիայի դեսպանը տարբեր երկրների այլ գործընկերների հետ կանչվել է Թուրքիայի ԱԳՆ

Թուրքիայի արտգործնախարարություն կանչված տարբեր երկրների դիվանագետների թվում է նաև այդ երկրում Գերմանիայի դեսպանը։ Այս մասին լրագրողներին հայտնել է Գերմանիայի ԱԳՆ ներկայացուցիչ Անդրեա Զասեն։

«Ես կարող եմ հաստատել, որ մեր դեսպանը տարբեր երկրների այլ գործընկերների հետ կանչվել է Թուրքիայի ԱԳՆ՝ զրույցի», - ճեպազրույցում ասել է Զասեն։

Ըստ նրա` կանչի պատճառը ահաբեկչությունների լուրերից հետո Ստամբուլում Գերմանիայի գլխավոր հյուպատոսության փակվելն է։

Թուրքիայի այլ քաղաքներում տեղակայված գերմանական դիվանագիտական ներկայացուցչությունները չեն փակվել, ասել է նա։

Ավելի վաղ Թուրքիայի արտգործնախարար Մևլութ Չավուշօղլուն, մեկնաբանելով Ստամբուլում արևմտյան մի շարք երկրների հյուպատոսությունների փակման հետ կապված իրավիճակը, ասել էր, որ դժվար է այդ երկրներին դաշնակիցներ և բարեկամներ անվանել։

Իսկ Ստամբուլում Շվեդիայի, Նիդեռլանդների, Մեծ Բրիտանիայի, Ֆրանսիայի, Շվեյցարիայի և Գերմանիայի գլխավոր հյուպատոսությունները հայտարարել են`  դադարեցրել են այցելուներ ընդունել քաղաքի կենտրոնում ահաբեկչական հարձակումների սպառնալիքի պատճառով։