«Որքան տեղյակ եմ` բոլոր դեպքերը կապված են մեկ միջադեպի հետ». Սինանյանը` որոշ դաշնակցական գործիչների մուտքը ՀՀ արգելելու մասին

Սփյուռքի գործերով գլխավոր հանձնակատար Զարեհ Սինանյանը լրագրողների հետ ճեպազրույցում անդրադարձավ որոշ դաշնակցական գործիչների մուտքը Հայաստան արգելելուն և նշեց` իմանալու համար, թե կոնկրետ ինչու է որոշ դաշնակցական գործիչների մուտքը Հայաստան արգելվում՝ ԱԱԾ-ին պետք է հարցնեք:

«Որքան որ ես տեղյակ եմ, բոլոր դեպքերը կապված են մեկ միջադեպի հետ. մեր պետական դրոշը կրող մեքենայի վրա ֆիզիկական հարձակում գործելու համար», - ասաց Սինանյանը։

Լրագրողների դիտարկմանը, թե դա բողոքի ակցիա է եղել՝ Զարեհ Սինանյանն ասաց.

«Բողոքի ակցիայի տարբեր ձևեր կան. ֆիզիկական հարձակումը և ձու նետելը համարյա ոչ մի տեղ ընդունելի ձև չի։ Ձու նետելը պետական սիմվոլները կրող մեքենայի վրա, որի մեջ նստած է Հայաստանի վարչապետը, բողոքի անընդունելի ձև է»։