Վրաստանի նախկին նախագահ Միխեիլ Սաակաշվիլիին ծանր վիճակում տեղափոխում են վերակենդանացման բաժանմունք՝ ասել է իր հիմնադրած «Միացյալ ազգային շարժում» ընդդիմադիր կուսակցության անդամ Գիորգի Չիլաձեն։

«Ես հենց նոր խոսեցի իմ անձնական բժշկի հետ… Նախագահի (նախկին նախագահ Սաակաշվիլիի- խմբ.) առողջական վիճակը գնահատվում է ծանր, նրա կյանքը փրկելու համար կարևոր է, որ նա տեղափոխվի վերակենդանացման բաժանմունք։ Այս պահին վերակենդանացման բաժանմունքը պատրաստվում է»,- լրագրողներին ասել է Չիլաձեն։

Սահակաշվիլիի ընտանիքի անդամներն օրաթերթին հայտնել են քաղաքական գործչի ծանր վիճակի մասին։ Ավելի վաղ անկախ բժիշկները հայտնել էին, որ Սահակաշվիլին թունավորվել է ծանր մետաղներով։ Թբիլիսիի քաղաքային դատարանը քննարկում է Սաակաշվիլիի ազատազրկման ժամկետը հնարավոր հետաձգելու գործը՝ արտերկրի կլինիկայում նրա բուժման նպատակով։

Սաակաշվիլին ձերբակալվել է Վրաստանում 2021 թվականի հոկտեմբերի 1-ին։  Քաղաքական գործիչը հեռակա դատապարտվել է բանկիր Սանդրո Գիրգվլիանիի սպանության և պատգամավոր Վալերի Գելաշվիլիին ծեծի ենթարկելու գործերով։ Առաջին դեպքում Սաակաշվիլին դատապարտվել է երեք տարվա ազատազրկման, երկրորդում՝ վեց տարվա։ Բացի այդ, նա մեղադրվում է 2007 թվականի նոյեմբերի 7-ի ընդդիմության հանրահավաքը ցրելու, «Իմեդի» հեռուստաընկերության ջարդերի և պետբյուջեի միջոցների յուրացման գործերով, որոնք դեռ քննվում են դատարանների կողմից։ Վրաստանի վարչապետ Իրակլի Ղարիբաշվիլին հայտարարել է, որ Սաակաշվիլին դեռ երկար կմնա բանտում։