Ադրբեջանի ԱԳՆ-ն քաղաքացիներին խորհուրդ է տալիս զերծ մնալ Իրան մեկնելուց

 Ադրբեջանի Արտաքին գործերի նախարարությունը քաղաքացիներին խորհուրդ է տալիս զերծ մնալ Իրան մեկնելուց: Այս մասին հայտարարություն է տարածել երկրի արտաքին գերատեսչությունը:

«Հաշվի առնելով Իրանում տիրող անկայուն իրավիճակը և մեր երկրի (խմբ. Ադրբեջանի) դիվանագիտական ​​ներկայացուցչության դեմ իրականացված ահաբեկչությունը՝ Ադրբեջանի քաղաքացիներին խորհուրդ է տրվում անհարկի չայցելել Իրան, իսկ այցելողներին խորհուրդ է տրվում ցուցաբերել ծայրահեղ զգուշություն։

Այս պահին Իրանում գտնվող Ադրբեջանի քաղաքացիներին խորհուրդ է տրվում պահպանել անվտանգության կանոնները»։

Նշենք, որ օրեր առաջ` հունվարի 27-ին, հարձակում է տեղի ունեցել Իրանի Իսլամական Հանրապետությունում Ադրբեջանի Հանրապետության դեսպանատան վրա։

Հարձակվողը ավտոմատից կրակ է բացել պահակակետի ուղղությամբ, սպանվել է անվտանգության ծառայության ղեկավարը, վիրավորվել են դեսպանատան երկու աշխատակիցներ։