Պուտինն ինձ համար ոչ ոք է. Զելենսկի

Ուկրաինայի նախագահ Վլադիմիր Զելենսկին հայտարարել է, որ շահագրգռված չէ Ռուսաստանի առաջնորդ Վլադիմիր Պուտինի հետ բանակցություններով, գրում են ուկրաինական լրատվամիոցները: 

«Ուղղակի ուզում եմ, որ նրանք որքան հնարավոր է շուտ դադարեցնեն պատերազմը և որքան հնարավոր է շուտ հեռանան մեր երկրից, վստահաբար կարող եմ ասել, որ եթե նրանք լքեն մեր տարածքը, պատերազմը կդադարի, վերջ»,- հավելել է պետության ղեկավարը։

Ըստ նրա` ռուսական հատուկ ռազմական գործողության մեկնարկից հետո Պուտինն իր համար դարձավ «ոչ ոք»։

«Նա ինձ չի հետաքրքրում։ Նրա հետ հանդիպելը, զրուցելը հետաքրքիր չէ։ Ես իսկապես չեմ հասկանում, թե ով է որոշում ընդունում Ռուսաստանում»,- ասել է Զելենսկին բրիտանական Sky News հեռուստաալիքին տված հարցազրույցում։

Ռուսաստանի Դաշնության նախագահի մամուլի քարտուղար Դմիտրի Պեսկովն ավելի վաղ ասել էր, որ Մոսկվայի և Կիևի միջև բանակցություններն այժմ անհնարին են, քանի որ նրանց համար դե ֆակտո կամ դե յուրե պայմաններ չկան։