Արևմուտքն ուղղակի ներքաշվում է հակամարտության մեջ․ Պեսկով

 Կրեմլի խոսնակ Դմիտրի Պեսկովն այսօր ասել է, որ հրասայլերի և այլ սպառազենի փոխանցումը Կիևին վկայում է այդ հակամարտությանն Արևմուտքի ուղղակի մասնակցության մասին:

Այդ մեկնաբանությամբ Պեսկովն արձագանքել է Ուկրաինային տասնյակ հրասայլեր փոխանցելու Միացյալ Նահանգների և Գերմանիայի որոշումներին:

 

«Եվրոպական մայրաքաղաքներում և Վաշինգտոնում մշտապես հավաստիացնում են, թե սպառազենի տրամադրումը չի նշանակում ներգրավում, բայց մենք կտրականապես դեմ ենք այդ մոտեցմանը: Նշված մայրաքաղաքների գործողություններն ուղղակի մասնակցության վկայություններ են, և այդ միտումը հետզհետե ուժեղանում է»,- ասել է Պեսկովը:

 

Միացյալ Նահանգների նախագահ Ջո Բայդենն ասել է, որ արևմտյան հրասայլերի փոխադրումը Ռուսաստանի դեմ ուղղված հարձակողական սպառնալիք չէ, և դրա նպատակն է օգնել ուկրաինացիներին «բարելավել բաց տեղանքներում մանևրելու ունակությունը»:

 

Զելենսկին Արևմուտքից մեծ թվով հրասայլեր և այլ զրահատեխնիկա է խնդրել և այն անվանել է «երկաթե բռունցք», որն անհրաժեշտ է ռուսների պաշտպանական գծերը ճեղքելու և նրանց գրավյալ տարածքներից վտարելու համար:

«Հատուկ ռազմական գործողության ընթացքը վկայում է, որ Միացյալ Նահանգները և ՆԱՏՕ-ն շարունակում են միջոցներ ձեռնարկել այն երկարաձգելու և ռազմական առճակատման կողմ դառնալու համար», - այսօր ասել է Ռուսաստանի Անվտանգության խորհրդի քարտուղար, նախագահ Վլադիմիր Պուտինի քաղաքական զինակից Նիկոլայ Պատրուշևը:

Քաղաքականություն

Պատահարներ