Ֆրանսիան ուրախ կլինի մասնակցել Հայաստանում ԵՄ առաքելությանը. Ֆրանսիայի ԱԳՆ ղեկավար

Ֆրանսիայի արտաքին գործերի նախարար Կատրին Կոլոննան անդրադարձել է Հայաստանում ԵՄ քաղաքացիական առաքելություն ստեղծելու որոշման կարևորությանը:
 

Թվիթերյան իր էջում նա գրել է, որ Ֆրանսիան ուրախ կլինի մասնակցել եվրոպական այս առաքելությանը:

ԵՄ Խորհրդի կայքը ավելի վաղ հայտնել է, որ ԵՄ ԱԳ նախարարներն այսօր հավանություն են տվել Ֆրանսիայի նախաձեռնությամբ Հարավային Կովկասում կարգավորմանը նպաստող քաղաքացիական առաքելության ստեղծմանը Հայաստանում։ 

Առաքելության խնդիրն է լինելու Հայաստանի սահմանամերձ շրջանների նկատմամբ վստահության բարձրացումը, հայ-ադրբեջանական հարաբերությունների կարգավորման համար պայմանների ստեղծումը։ Առաքելության մանդատը նախատեսված է 2 տարվա համար։ 

Որոշմանն անդրադարձել է նաև ԵՄ բարձր ներկայացուցիչ Ժոզեպ Բորելը՝ ընդգծելով, որ ԵՄ առաքելության հաստատումը Հայաստանում ազդարարում է Հարավային Կովկասում ԵՄ-ի ներգրավվածության նոր փուլ։ 

«ԵՄ-ն շարունակելու է աջակցել լարվածության լիցքաթափման ջանքերին, և աշխատել երկու կողմերի հետ` տարածաշրջանում կայուն խաղաղության հաստատման վերջնական նպատակով»,-հայտնել է պաշտոնյան: