«Վագները» գումարը հայթայթում է աֆրիկյան ոսկու արդյունահանման միջոցով». Politico

Նախագահ Վլադիմիր Պուտինի մերձավորը համարվող մեծահարուստ գործարար Եվգենի Պրիգոժինի ստեղծած «Վագներ» մասնավոր ռազմական կազմակերպությունն Ուկրաինայի պատերազմին մասնակցելու համար գումարը ստանում է Կենտրոնաֆրիկյան հանրապետությունում արդյունահանած ոսկու և օգտակար այլ հանածոների վաճառքի միջոցով: 

Այդ մասին հայտնել է Politico պարբերականը:

Լրագրողները վկայակոչում են արևմտյան պաշտոնյաներից դիվանագիտական խողովակով ստացված հեռագիրը, որը կազմվել է Միացյալ Նահանգներում: Ըստ այդ փաստաթղթի, «Վագներ» մասնավոր ռազմական կազմակերպությունն էապես ընդարձակել է ներկայությունը Կենտրոնաֆրիկյան հանրապետությունում և այնտեղ հսկողության տակ է վերցրել օգտակար հանածոների արդյունահանումը:

2022 թվականին Կենտրոնաֆրիկյան հանրապետությունում «Վագների» եկամուտը գերազանցել է մեկ միլիարդ ԱՄՆ դոլարը:

Միացյալ Նահանգները բազմիցս է նախազգուշացրել, որ հետզհետե ավելի ակտիվ գործող «Վագները» Կենտրոնաֆրիկյան հանրապետությունում վաստակած ֆինանսական միջոցներով աջակցում է պատժամիջոցների տակ հայտնված Ռուսաստանի կառավարությանը: