«Չեմ ողջունում Ռուսաստանի հետ թռիչքների վերսկսումը». Վրաստանի նախագահ

Վրաստանի նախագահ Սալոմե Զուրաբիշվիլին չի պաշտպանել Ռուսաստանի հետ ուղիղ ավիաչվերթերը վերականգնելու գաղափարը և կոչ է արել կարգավորել երկրում ռուսաստանցիների գտնվելու պայմանները։ Այս մասին ասվում է նրա վարչակազմի կայքում հրապարակված մամուլի հաղորդագրության մեջ։ Հաղորդագրությունը տարածվել է «Չեմ ողջունում Ռուսաստանի հետ թռիչքների վերսկսումը» վերտառությամբ։

«Ես բազմիցս հորդորել եմ կառավարությանը լրջորեն ուսումնասիրել Ռուսաստանի քաղաքացիների հոսքի հարցը՝ իր բոլոր սոցիալ-քաղաքական պարամետրերով, որպեսզի հասարակությունը զգա, որ իր ազգային շահերն ու անվտանգությունը հաշվի են առնվում և պաշտպանվում»,- ասվում է հաղորդագրության մեջ։ 

Զուրաբիշվիլիի խոսքով՝ Վրաստանը կանոնակարգման կարիք ունի աշխատանքի թույլտվությունների տրամադրման, բիզնեսի գրանցման, գույք ձեռք բերելու և ռուսալեզու դպրոցների բացման ոլորտում։