ՏԵՍԱՆՅՈՒԹ. Այնքան թույլիկ են, որ չտրվելու միակ տարբերակը բանակցություններին չգնալն է. Մամիջանյանը` իշխանության մասին

 Այս պահի դրությամբ փակուղու մեջ են երկու բանակցային ուղղությունն էլ` և՛ վաշինգտոնյան, և՛ ռուսական։ Ազգային ժողովում խորհրդարանական ճեպազրույցների ժամանակ այս մասին ասաց «Պատիվ ունեմ» խմբակցության ղեկավար Հայկ Մամիջանյանը` անդրադառնալով Հայաստանի և Ադրբեջանի միջև խաղաղության պայմանագրի շուրջ ծավալվող գործընթացին։ Լավ չէ, որ այնքան թույլիկ են, որ չտրվելու միակ տարբերակը բանակցություններին չգնալն է, ասել է Մամիջանյանը:

Պատգամավորի խոսքով` այդ փակուղային իրավիճակն առաջացել է ՀՀ վարչապետ Նիկոլ Փաշինյանի վարած «աբսուրդային» քաղաքականության հետևանքով։

«Միջազգային հարաբերությունների տեսանկյունից ՀՀ արտաքին քաղաքականությունը դասագրքերի մեջ պետք է մտնի որպես նոնսենս։ Առկա է երկու խաղաղության բանակցություն։ Մեկով Արցախի վերաբերյալ հիշատակում չկա (վաշինգտոնյան տարբերակ,– խմբ.), մյուսով առկա է հիշատակում և առկա է ինքնորոշման հնարավորություն (ռուսական տարբերակ)։ Հայաստանը պաշտոնապես հայտարարել է, որ պատրաստ է համաձայնել երկուսին էլ։ Սա աբսուրդ է»,–ասաց Մամիջանյանը։

Նրա կարծիքով` անհասկանալի է` ինչ սկզբունքով է Փաշինյանը երկու անկյունաքարային տարբերություն ունեցող պայմանագրի պայմաններում համաձայնում երկուսին էլ։

«Փաշինյանի քաղաքականությունն է` որ տարբերակը որ կստացվի», - ասաց Մամիջանյանը։

Ավելի վաղ ՀՀ վարչապետ Նիկոլ Փաշինյանը հայտնել էր պաշտոնական Երևանի պատրաստակամությունը՝ Պրահայի պայմանավորվածությունների հիման վրա խաղաղության պայմանագիր կնքելուԱդրբեջանի հետ:

Ընդդիմադիր խմբակցության ղեկավարը, անդրադառնալով Փաշինյանի այս հայտարարությանը, նշեց, որ Պրահայի պայմանավորվածությունները հիմնվում են Ալմա Աթայի հռչակագրի վրա, որը Ադրբեջանը վերջին 30 տարիների ընթացքում երբեք չի ներկայացրել բանակցությունների ընթացքում:

Այդ թեզը, ըստ նրա, առաջ են քաշել Հայաստանի իշխանությունները։ Եվ նույնիսկ այդ դեպքում պետք է հիշել, որ Հայաստանը հռչակագրին միացել է վերապահումով. այնտեղ առանձին նշված է ինքնորոշման կետը։ Բացի այդ, հռչակագիրը չի վերաբերում Լեռնային Ղարաբաղին, քանի որ այնտեղ դրանից 20 օր առաջ հանրաքվե է անցկացվել։