Նազարբաևը զրկվել է արտոնություններից ու երաշխիքներից
Ղազախստանի Սահմանադրական դատարանը Նուրսուլթան Նազարբաևին զրկել է Էլբասի կոչումից։ Այս մասին գրում է Говорит Москва-ն։
Ատյանը որոշել է անվավեր ճանաչել «Ղազախստանի Հանրապետության առաջին նախագահ Էլբասի մասին» օրենքը, որը Նազարբաևին հռչակել է ազգի առաջնորդ և նրան տրամադրել ցմահ արտոնություններ ու երաշխիքներ։
«Հիմք ընդունելով 2022 թվականի հունիսի 5-ի հանրաքվեում արտահայտված Ղազախստանի ժողովրդի կամքը՝ ճանաչել, որ ներկայումս Սահմանադրության մեջ չկան իրավական հիմքեր «Հանրապետության առաջին նախագահի մասին» սահմանադրական օրենքի պահպանման համար... որի կապակցությամբ այն ենթակա է անվավեր ճանաչման»,- ասված է դատարանի որոշման մեջ։
Նուրսուլթան Նազարբաևը Ղազախստանը գլխավորել է շուրջ 30 տարի։ Նա պաշտոնը լքել է 2019 թվականի մարտին։ Նոր նախագահ է դարձել Կասիմ-Ժոմարտ Տոկաևը։
