Պուտինն ու Ռաիսին հեռախոսազրույց են ունեցել. ինչ է քննարկվել

Ռուսաստանի նախագահ Վլադիմիր Պուտինը հեռախոսազրույց է ունեցել Իրանի նախագահ Էբրահիմ Ռաիսիի հետ, չորեքշաբթի հայտնել է Կրեմլի մամուլի ծառայությունը։ Այս մասին գրում է Интерфакс-ը:
 

«Դիտարկվել են ռուս-իրանական օրակարգի արդի հարցերը՝ շեշտը դնելով երկկողմ համագործակցության ողջ շրջանակի հետագա զարգացման վրա։ Մասնավորապես, նախագահները կողմ են արտահայտվել էներգետիկ, տրանսպորտի և լոգիստիկայի ոլորտներում փոխշահավետ նախագծերի հետևողական իրականացմանը» - նշվում է մամուլի ծառայության հաղորդագրության մեջ։
 

Միջազգային հարցերի քննարկման ժամանակ երկու կողմերը դրական են գնահատել Աստանայի գործընթացի շրջանակներում հաստատված սերտ համակարգումը, որն առանցքային դեր է խաղում սիրիական կարգավորման հարցում։ Կողմերը մտադրություն են հայտնել շարունակելու համագործակցությունը՝ Սիրիայի Արաբական Հանրապետությունում իրավիճակի կարգավորման և նրա տարածքային ամբողջականության վերականգնման նպատակով։

«Նախատեսվում է մի շարք բարձր մակարդակի երկկողմ շփումներ անցկացնել»,- հայտնել են Կրեմլի մամուլի ծառայությունից։