Կասկածելի գործարքներ, սեփական շահ. Ներկայացուցիչների պալատը տվյալներ է պահանջել Բայդենի ընտանիքի բիզնեսների մասին

ԱՄՆ Կոնգրեսի Ներկայացուցիչների պալատի Վերահսկիչ հանձնաժողովի նախագահ Ջեյմս Քոմերը չորեքշաբթի պահանջել է ֆինանսների նախարար Ջանեթ Յելենից տեղեկություններ տրամադրել ԱՄՆ նախագահ Ջո Բայդենի ընտանիքի և նրա մերձավոր անձանց` ամերիկյան բանկերի կողմից հայտնաբերված կասկածելի բիզնես գործարքների մասին։ Այս մասին գրում է Интерфакс-ը:

«Վերջին երկու տարիների ընթացքում Բայդենի վարչակազմը և ամերիկյան խոշոր տեխնոլոգիական ընկերությունները ջանասիրաբար աշխատել են Բայդենների ընտանիքի կասկածելի բիզնես սխեմաների և անձամբ Ջո Բայդենի ներգրավվածության մասին տեղեկությունները թաքցնելու համար:

Տարիների ընթացքում Բայդենների ընտանիքը եսասիրական նպատակներով օգտագործել է ազդեցությունն ամբողջ աշխարհում հաճախ մեր երկրի շահերի հաշվին։ Ամերիկացի ժողովուրդը պետք է իմանա, թե Ջո Բայդենը որքանով է ներգրավված իր ընտանիքի մութ գործարքներում, և արդյոք այդ գործարքները սպառնում են ազգային անվտանգությանը, և ինչպես է նա որոշումներ կայացնում որպես նախագահ»,- ասել է Քոմերը կոմիտեի կայքում հրապարակված կոմյունիկեում։

«Ըստ ԶԼՄ-ների տեղեկությունների՝ ամերիկյան բանկերից ստացվել են տվյալներ` Հանթեր Բայդենի (Ջո Բայդենի որդին) և Բայդենի միջազգային գործընկերների ավելի քան 150 գործարքների կասկածելի գործունեության մասին,  որոնց հիման վրա ֆինանսների նախարարությունը պետք է որոշի, թե արդյոք դրանք անօրինական են և արդյոք վտանգ են ներկայացնում ազգային անվտանգության համար։ Ֆինանսների նախարարությունը երկար տարիներ օգտագործել է այս պրակտիկան և տվյալներ փոխանցել Կոնգրեսին, սակայն Բայդենի վարչակազմը սահմանափակել է նրանց մուտքը՝ հարցեր առաջացնելով Բայդենի և նրա ընկերների կասկածելի գործունեությունը քողարկելու հնարավոր փորձերի մասին»,- նշվում է կոմյունիկեի մեջ։