Այսօր՝ դեկտեմբերի 30-ին, կրակոցներ են հնչել Երևանում։ Ժամը 02։15-ի սահմաններում ոստիկանության Արաբկիրի բաժին օպերատիվ տեղեկություններ են ստացվել, որ Մամիկոնյանց փողոցի 38/1 հասցեում կրակոցներ են հնչել։ Նույն ժամին ահազանգ է հնչել նաև ՀՀ ոստիկանության Պարեկային ծառայություն, որ նշված վայրում կրակոցներ են հնչել և կա վիրավոր քաղաքացի։ Հայտնում է Shamshyan-ը:

Ոստիկաններն ու պարեկները նշված շենքի բակում հայտնաբերել են արնանման հետքեր, ատրճանակ, 2 փամփուշտ։

Դեպքի վայրում հավաքված մի քանի քաղաքացիներ, ովքեր հրաժարվեցին տեսախցիկի առաջ խոսել, ասում էին․ «Լսեցինք շտապօգնության ու պարեկների ավտոմեքենաների ձայնային ազդանշանները ու տեսանք, որ պարեկները արտասահմանյան մակնիշի ավտոմեքենայի միջից վիրավոր մի քաղաքացու իջեցրեցին և վազելով մոտեցրեցին շտապօգնության ավտոմեքենային։

Բժշիկներն էլ տեղում բուժօգնություն ցուցաբերեցին ու վիրավորին տեղափոխեցին հիվանդանոց։ Հետո տեսանք, որ մեծ թվով ոստիկաններ, պարեկներ մտան բակ ու պարեկները սկսեցին լենտով փակել այդ հատվածը»։

Ոստիկանները ու քննիչները պարզել են, որ Երևանի թիվ 1 համալսարանական հիվանդանոց է տեղափոխվել Երևանի բնակիչ 35-ամյա Էդուարդ Ն․-ն, ում մարմնի վրա առկա է եղել 10-ից ավելի սուր կտրող-ծակող գործիքով ստացած բազմաթիվ հարվածի հետքեր։ Դեպքի փաստով Արաբկիրի քննչական բաժնում նախաձեռնվել է քրեական վարույթ։

Հիվանդանոցում բժիշկները ոստիկաններին և քննիչներին հայտնել են, որ վիրավորն ի վիճակի չէ կատարվածի մասին բացատրություն տալու, քանի որ գտնվում է վերակենդանացման բաժանմունքում։

Լրատվականի տեղեկություններով՝ վիրավորի հայրը ոստիկանության նախկին գնդապետ Վարդան Նադարյանն է, ով աշխատել է նաև ոստիկանության Շիրակի մարզային վարչության պետ, և նրա մասին դեպքի վայրում հավաքված քաղաքացիներն ասում էին, որ գուցե տղայի հետ հաշվեհարդար են տեսել հոր պատճառով, ով բազմաթիվ քաղաքացիների խոշոր չափի գումարներ է պարտք։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։