Եթե վախենում են Արցախի խորհրդանիշներից, հրաժարվում են մեր պատմությունից․ Մետաքսե Հակոբյանի

Արցախի ԱԺ պատգամավոր Մետաքսե Հակոբյանն անդրադարձել է Երևանի Անուշավան Տեր-Ղևոնդյանի անվան երաժշտական դպրոցի ցուցահանդեսում տեղի ունեցած միջադեպին, որի ընթացքում դպրոցի տնօրենի պաշտոնակատարը տաղավարից հեռացրել էր «Մենք ենք մեր սարերը» («Տատիկ-պապիկ») հուշարձանի պատկերը՝ այն որակելով «հակապետական քայլ»։

Հակոբյանի խոսքով՝ անկախ նրանից, թե տեղի ունեցածը մեկ պաշտոնյայի անձնական որոշման հետևանք է եղել, թե ոչ, այն բացահայտում է ավելի խորքային խնդիր։

«Երբ «Մենք ենք մեր սարերը» հուշարձանը՝ Արցախի ամենահայտնի խորհրդանիշներից մեկը, կարող է ընկալվել որպես «հակապետական», դա արդեն ոչ թե մեկ նկարի, այլ մեր հավաքական հիշողության նկատմամբ ձևավորված վտանգավոր վերաբերմունքի մասին է»,- գրել է նա։

Պատգամավորն ընդգծել է, որ մշակութային ինքնությունը չի կարող կախված լինել քաղաքական իրավիճակից, իսկ Արցախի խորհրդանիշներից հրաժարվելը նշանակում է հրաժարվել պատմական հիշողությունից։

«Եթե Ադրբեջանը ոչնչացնում է Արցախի մշակութային ժառանգության նյութական մասը, ապա Հայաստանում չպետք է վտանգվի դրա ոչ նյութական բաղադրիչը՝ հիշողությունը, անվանումները, խորհրդանիշներն ու մշակութային ինքնությունը»,- նշել է Հակոբյանը։

Գրառման վերջում նա հավելել է, որ այս պատմության հաղթողը ոչ թե դպրոցի տնօրենի պաշտոնակատարն է, այլ այն երեխան, որը նկարով ներկայացրել է իր հիշողությունը, և ուսուցչուհին, որը, նրա խոսքով, հավատարիմ է մնացել իր արժեքներին։