ՏԵՍԱՆՅՈՒԹ. Արցախցի երեխաներն ակցիա են իրականացնում ՄԱԿ-ի գրասենյակի առջև
Արցախի շրջափակման հետևանքով Երևանում մնացած երեխաները ՄԱԿ-ի հայաստանյան գրասենյակի առջև յուրահատուկ միջոցառում են կազմակերպել՝ ստեղծագործական ձևով ներկայացնելով իրենց հույզերը: Այն նաև բողոքի ակցիա է՝ ցույց տալու՝ ինչ ապրումներ ունեն երեխաները՝ հայտնվելով այս իրավիճակում:
Հիշեցնենք, որ արդեն մեկ շաբաթ է՝ Ադրբեջանը փակել է Արցախը Հայաստանին կապող միակ ճանապարհը:
Դեկտեմբերի 12-ի առավոտյան ժամը 10:30–ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ փակել են Ստեփանակերտ-Գորիս մայրուղին: Ադրբեջանական կողմը դեկտեմբերի 13-ին նաև փակել է Արցախի գազամատակարարումը։
Արցախի պետնախարար Ռուբեն Վարդանյանն գլխավորությամբ ստեղծվել է օպերատիվ շտաբ, որը գործելու է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով: Դեկտեմբերի 14-ից սկսած բողոքի ակցիաներ են սկսվել ՀՀ-ում տարբեր կառույցների ներկայացուցչությունների և դեսպանությունների մոտ։
Նշենք նաև, որ Կառավարության նիստում վարչապետ Նիկոլ Փաշինյանը հայտարարել է, որ Ադրբեջանը շարունակաբար իրագործում է «Լեռնային Ղարաբաղն առանց հայերի» քաղաքականություն և հայկական կողմն ամեն ինչ պետք է անենք, որ այս քաղաքականությունը պատշաճ միջազգային գնահատականի արժանանա: Դեկտեմբերի 16-ի վաղ առավոտյան Արցախի պետնախարարը հայտնեց, որ վերականգնվել է Արցախի գազամատակարարումը:
