Թուրքիան օդային հարվածներ է հասցրել սիրիական Քոբանի քաղաքին

 Թուրքական բանակը շաբաթ երեկոյան օդային հարվածներ է հասցրել Հալեպի հյուսիսային նահանգի Քոբանի քաղաքի ուղղությամբ։ Այս մասին hայտնում է Agence France-Presse-ը՝ վկայակոչելով քրդական «Սիրիայի դեմոկրատական ​​ուժերի»  ներկայացուցչին։

Նշվում է, որ հարվածներ են հասցվել նաև Սիրիայի հյուսիս-արևելքում գտնվող Հասաքե գավառի թիրախներին։

Քրդական ծագումով հայտնի թուրք լրագրող և վերլուծաբան Ամբերին Զամանը հայտնում է, որ հարվածները հասցվում են «ռուսական օդուժի պատասխանատվության տակ գտնվող» տարածքում։
 

Հիշեցնենք` նոյեմբերի 13-ին Ստամբուլի կենտրոնում տեղի ունեցած պայթյունի հետեւանքով զոհվել է 6 մարդ, վիրավորվել ավելի քան 80-ը։ Ըստ քննիչների՝ Թուրքիայում արգելված Քրդստանի աշխատավորական կուսակցությունը և Ժողովրդական ինքնապաշտպանության ուժերը ներգրավված են եղել ահաբեկչության մեջ։