Սերբիայի նախագահը՝ Կոսովոյում դժոխքի մասին

Սերբիայի նախագահ Ալեքսանդր Վուչիչը սպասում է, որ կոսովոալբանական իշխանությունները չեն չեղարկի իրենց որոշումը սերբական համարների համար գանձվող տուգանքների վերաբերյալ, ինչը նոյեմբերի 21-ից հետո կտրուկ կսրի իրավիճակը Կոսովոյում և Մետոխիայում։ 

Սերբիայի առաջնորդը հիշեցրել է, որ երկուշաբթի առավոտյան Բրյուսելում սպասվում են Բելգրադի և Պրիշտինայի հերթական բանակցությունները, որոնց մասնակցելու է նա։ Սպասվում է նաև Կոսովո ինքնահռչակ պետության «վարչապետ» Ալբին Կուրտիի մասնակցությունը։ 
Հիմնական թեման Սերբիայի իշխանությունների կողմից տրամադրած մեքենայի պետհամարանիշերի համար գանձվող տուգանքների վերաբերյալ կոսովոալբանական իշխանությունների որոշման ուժի մեջ մտնելն է։ 

«Եթե ցանկանար (Կուրտին – խմբ.) հետաձգել որոշումը, ավելի վաղ կաներ։ Կարծում եմ` բանակցությունների գաղափարը որոշումը հետաձգելու հնարավորություն տալն է։ Բայց Կուրտին ցույց տվեց, որ չի ցանկանում Կոսովոյում և Մետոխիայում տեսնել սերբերի ներկայությունը», – TV Prva–ի եթերում հայտարարել է Վուչիչը։ 

Նրա խոսքով` եթե Պրիշտինան սկսի ուժով վիճահարույց քայլեր ձեռնարկել, ապա Կոսովոյի հյուսիսում և Մետոխիայում էսկալացիան անխուսափելի է։ 
«Կոսովոյի ոստիկանությունը Կոսովոյի հյուսիսում և Մետոխիայում անելիք չունի, եթե նրանք խառնվեն, դժոխք կլինի։ Սերբիան այդ դեպքում իր ժողովրդի հետ կլինի, սերբերն էլ պաշտպանելու են իրենց օջախները», – ընդգծել է Սերբիայի առաջնորդը։ 
Նա նաև հավելել է, որ Բելգրադն արել է ամեն բան տարածաշրջանում խաղաղությունը պահպանելու համար։ 
 

Հիշեցնենք, որ կոսովոալբանական իշխանությունները տեղացի սերբերից պահանջում են վերագրանցել «КМ» տառերով Սերբիայի իշխանությունների կողմից տրված բոլոր պետհամարանիշերը` փոխարինելով դրանք «RKS» գրությամբ և Կոսովոյի խորհրդանիշով, իսկ նոյեմբերի 21-ից մտադիր են այս պահանջը խախտողներին տուգանել։