Զելենսկու գրասենյակը՝ Ղրիմի վրա Կիևի հարձակման ծրագրերի ու Մոսկվայի հետ բանակցությունների «տարօրինակ» լինելու մասին
Ուկրաինայի նախագահի աշխատակազմի ղեկավար Անդրեյ Երմակը վստահություն է հայտնել Ղրիմի վրա հարձակողական գործողություն սկսելու՝ Կիևի ծրագրերի վերաբերյալ։ Այդ մասին նա ասել է Politico-ին։
Նշվում է, որ Երմակը չի նշել թերակղզու վրա հարձակման մեկնարկի ժամկետները:
Կիեւի «խոշոր ռազմական հաղթանակների շարքից» հետո՝ Մոսկվայի հետ բանակցություններ վարելու հարցում Ուկրաինային համոզելու Արեւմուտքի փորձերը «տարօրինակ» են եւ հավասարազոր են հանձնվելու պահանջին, AFP-ին ասել է Ուկրաինայի նախագահի աշխատակազմի պաշտոնական ներկայացուցիչ Միխայիլ Պոդոլյակը։
«Երբ ռազմի դաշտում նախաձեռնություն ունես, մի փոքր տարօրինակ է ստանալ այնպիսի առաջարկներ, ինչպիսիք են՝ «միեւնույն է, ամեն ինչ ռազմական ճանապարհով չես կարող անել, պետք է բանակցելը»», - ասել է նա։
Պոդոլյակի խոսքով, դա կնշանակի, որ այն երկիրը, որը «վերականգնում է իր տարածքները, պետք է կապիտուլյացիայի ենթարկի մի երկրի, որը կորցնում է»։
Վերջերս ամերիկյան լրատվամիջոցները հայտնել են, որ որոշ բարձրաստիճան պաշտոնյաներ սկսել են Ուկրաինային կոչ անել քննարկել բանակցությունների տարբերակը, ինչը Ուկրաինայի նախագահ Զելենսկին առայժմ մերժել է:
«Պետք է փոխըմբռնում լինի, որ ռազմական հաղթանակին, գուցե բառի բուն իմաստով, հնարավոր չէ հասնել ռազմական ճանապարհով», - այս ամսվա սկզբին ասել էր ամերիկացի ավագ գեներալ Մարկ Միլին՝ գնահատելով, «բանակցությունների հնարավորությունների պատուհանի առկայությունը»:
Պոդոլյակի խոսքով՝ Մոսկվան խաղաղ բանակցությունների վերաբերյալ «ուղիղ առաջարկներ չի արել» Կիեւին՝ նախընտրելով միջնորդել եւ նույնիսկ բարձրացնել հրադադարի հնարավորությունը. «Կիեւում նման խոսակցությունները ընկալվում են որպես Կրեմլի պարզ մանեւրում՝ մարտադաշտում շունչ քաշելու եւ նոր հարձակման նախապատրաստվելու համար։ Ռուսաստանը բանակցություններ չի ցանկանում. Ռուսաստանը հաղորդակցական արշավ է վարում, որը կոչվում է «բանակցություններ»։
Նա պնդել է, որ Արեւմուտքը չի կարող ստիպել Ուկրաինային բանակցություններ վարել։ «Այսօր նույնիսկ մի փոքր դադարը միայն ավելացնում է այն կորուստները, որ կրել է Ուկրաինան»,- ասել է պաշտոնյան։
