Զելենսկին կգնա Ռուսաստանի հետ բանակցությունների, բայց կան պայմաններ
Ուկրաինայի նախագահ Վլադիմիր Զելենսկին անդրադարձել է արևմտյան ԶԼՄ-ների տեղեկություններին, թե Կիևը մղվում է Ռուսաստանի հետ երկխոսության և նշել, թե որոնք ենք Ուկրաինայի պայմանները Ռուսաստանի հետ երկխոսություն սկսելու համար։
Ավելի վաղ Զելենսկին հրամանագիր է ստորագրել՝ Ռուսաստանի նախագահ Վլադիմիր Պուտինի հետ բանակցություններ վարելու անհնարինության մասին։ Նա նաև հայտարարել է, որ Ուկրաինան ոչ մի բանակցություն չի վարի Ռուսաստանի հետ, քանի դեռ երկրի նախագահը Պուտինն է։
«Եվս մեկ անգամ՝ տարածքային ամբողջականության վերականգնում, ՄԱԿ-ի կանոնադրության հարգանք, պատերազմի պատճառած բոլոր վնասների փոխհատուցում, յուրաքանչյուր ռազմական հանցագործի պատիժ և երաշխիքներ, որ դա այլևս չի կրկնվի: Դրանք միանգամայն հասկանալի պայմաններ են»,- ասել է Զելենսկին իր կոչում, որը նա տեղադրել է Telegram ալիքում։
Իտալական la Repubblica թերթն ավելի վաղ գրել էր, որ ԱՄՆ-ը և ՆԱՏՕ-ն քննարկում են այն պայմանները, որոնց դեպքում կարող է վերսկսվել Ուկրաինայի և Ռուսաստանի միջև երկխոսությունը։
The Washington Post-ը, վկայակոչելով քննարկումներին ծանոթ մարդկանց, հաղորդում է, որ ԱՄՆ նախագահ Ջո Բայդենի վարչակազմը մասնավոր կերպով խնդրում է Ուկրաինայի ղեկավարությանը բաց լինել Ռուսաստանի հետ բանակցությունների համար։
Ամերիկյան The Wall Street Journal թերթը, հղում անելով իր աղբյուրներին, հայտնում է, որ ԱՄՆ ազգային անվտանգության հարցերով խորհրդական Ջեյք Սալիվանը վերջին ամիսներին գաղտնի բանակցություններ է վարել ՌԴ նախագահի միջազգային հարցերով օգնական Յուրի Ուշակովի և ՌԴ Անվտանգության խորհրդի քարտուղար Նիկոլայ Պատրուշևի հետ։
Հրատարակության աղբյուրների համաձայն՝ բանակցությունների նպատակն է եղել կանխել Ուկրաինայում հակամարտության սրումը, ներառյալ միջուկային զենքի կիրառման սպառնալիքը, ինչպես նաև երկու երկրների միջև հաղորդակցության բաց ուղիների պահպանումը։
