Ռուսաստանի կախվածությունը իրանական զենքից աճում է. ISW

Պատերազմի ուսումնասիրման ամերիկյան ինստիտուտը (ISW) գրել է, որ Ռուսաստանի կախվածությունը իրանական զենքից աճում է։ Այս մասին հայտնում է BBC-ի ռուսական ծառայությունը։

Նշվում է, որ Ինստիտուտը նոյեմբերի 1-ի վերլուծության մեջ, մասնավորապես, վերապատմել է ուկրաինական և ամերիկյան աղբյուրներից ստացված հաղորդումները այն մասին, որ իրանցիները պատրաստվում են Ռուսաստանին մատակարարել անօդաչու թռչող սարքերի նոր խմբաքանակներ, ինչպես նաև բալիստիկ հրթիռներ և ենթադրություն է արել, որ դա հանգեցրել է իրանական զենքից Ռուսաստանի կախվածության աճին։

Ըստ ուկրաինական հետախուզության, ինչպես նաև անանուն արևմտյան փորձագետների, որոնցից հարցազրույց է վերցրել ամերիկյան CNN հեռուստաալիքը, Իրանը շուտով Ռուսաստանին կուղարկի հարյուրավոր նոր կամիկաձե անօդաչուներ, որոնք Ռուսաստանը օգտագործում է Ուկրաինայի քաղաքացիական ենթակառուցվածքը խոցելու համար, ինչպես նաև փոքր հեռահարության տակտիկական բալիստիկ հրթիռներ:

«Ռուսաստանը, ամենայն հավանականությամբ, բանակցել է իրանական լրացուցիչ սպառազինությունների մատակարարումների շուրջ՝ կապված ուկրաինական պատերազմի ընթացքում թեւավոր հրթիռների և անօդաչուների սեփական պաշարների սպառման հետ, հատկապես ուկրաինական կրիտիկական ենթակառուցվածքի դեմ ռուսական արշավի ժամանակ։ Ռուսաստանը ենթադրաբար կշարունակի անօդաչու թռչող սարքերով և հրթիռներով հարվածներ հասցնել ուկրաինական կարևոր ենթակառուցվածքներին՝ փորձելով փոխհատուցել իր սովորական ուժերի ձախողումները ճակատում»,- գրում են Պատերազմի ուսումնասիրման ինստիտուտի վերլուծաբանները։