Բերդի կալանավորված համայնքապետը հրաժարվել է իր մանդատից
Տավուշի մարզի Բերդ համայնքի ղեկավար Հարություն Մանուչարյանը որոշում է կայացրել հրաժարվել համայնքի ավագանու անդամի իր մանդատից։ Տեղեկությունը հայտնել է «Զորավոր համայնք» դաշինքը` Facebook-ում հրապարակելով նրա հայտարարությունը։
«Օրեր առաջ մենք միասին հաղթեցինք մեր համայնքում և հերթական անգամ ապացուցեցինք, որ թասիբով ու պատվով ժողովուրդ ենք: Այսօր ցանկանում եմ ձեզ տեղեկացնել, որ որոշում եմ կայացրել հրաժարվել համայնքի ավագանու իմ մանդատից: Այդ որոշումը վերաբերում է միայն մանդատին, այլ ոչ երբեք այն պարտականություններին և պարտավորություններին, որոնք ես ստանձնել եմ ձեր առաջ և խոսք եմ տվել իրականացնել: «Զորավոր Համայնք» դաշինքը ձեր վստահությամբ և աջակցությամբ հաղթանակ է տարել և իրականացնելու է տրված խոստումները:
Համայնքի բարեկեցությունը, զարգացումը, ապահովությունն ու անվտանգությունն ինձ համար վեր են ցանկացած տեսակի անձնական շահից և պաշտոնից: Ես շարունակելու եմ ապրել ու աշխատել հանուն մեր համայնքի: Ես մեր դաշինքի մի մասն եմ, շարունակում եմ մնալ ձեզանից յուրաքանչյուրի կողքին կանգնած և յուրաքանչյուրիդ հոգսով ապրող»,- նշվում է հայտարարությունում:
Հիշեցնենք` Հարություն Մանուչարյանն անցած տարվանից կալանավորված է։ Նա սեպտեմբերի 25-ին անազատության վայրից վերընտրվեց իր պաշտոնում՝ հաղթելով «Քաղաքացիական պայմանագիր» կուսակցության թեկնածու Վահրամ Սուքիասյանին։
