Որն է եղել Երևանում ճանապարհի փլուզման պատճառը․ քաղաքապետարանից հայտնում են

 Ինչպես արդեն հայտնել էինք, Երևանի Լենինգրադյան փողոցից դեպի Ծիծեռնակաբերդի խճուղի տանող հատվածում այսօր տեղի է ունեցել հողաշերտի փլվածք, որն ուղեկցվել է ավտոճանապարհից մոտ 22 քմ հատվածի և երկաթբետոնե հենապատի փլուզումով։ Արդյունքում երկու արտաքին լուսավորման սյուն շրջվել է, վնասվել են մալուխներ և կոյուղատար խողովակ, առկա է ճանապարհահատվածի կրկին փլուզման վտանգ։ Տուժածներ չկան, սակայն Ծիծեռնակաբերդի խճուղին երկկողմանի փակվել է։

Եևանի քաղաքապետարանի լրատվության վարչության պետ Լևոն Սարդարյանը Auroranews.am-ին հայտնեց, որ  ճանապարհի փլուզումը տեղի է ունեցել շինարարական նորմերը չպահպանելու և ամրաշինական աշխատանքներ չիրականացնելու հետևանքով։  Սարդարյանը նաև նշեց, որ փլուզման հատվածում շինաշխատանքներն իրականացնում է «Սահակյանշին» ՓԲԸ–ն։ Ըստ նախնական տեղեկությունների այդ հատվածում երթևեկությունը կսահմանափակվի 1-ից 1,5 ամսով։