Քննիչները հայհոյեցին զոհվածների ծնողներին․ Վահան Հովհաննիսյան
ՔԿ զինվորական գլխավոր վարչության քննիչները զոհված զինծառայողների ծնողների հասցեին սեռական հայհոյանքներ են տվել։ Այս մասին լրագրողներին հայտնեց ծնողների փաստաբան Վահան Հովհաննիսյանը` ՔԿ–ում տեղի ունեցած փակ հանդիպումից դուրս գալուց հետո։
«Հանդիպումը վերջանալուց հետո զինվորական գլխավոր վարչության քննիչները, աշխատակիցները, որոնք հիմա կանգնած են այստեղ, որոնց անձամբ չեմ ճանաչում, զոհվածների ծնողների հասցեին տվեցին սեռական բնույթի հայհոյանքներ, մայր հայհոյեցին, որից հետո աղմուկ բարձրացավ»,– հայտնել է նա, փոխանցում է Sputnik-ը։
Փաստաբանը նշել է նաև, որ հանդիպման ընթացքում պարզվել է, որ զինվորական դատախազությունում իրենց սխալ ինֆորմացիա են տվել` ասելով, որ իրենց միջնորդությունը բավարարել են։
«Զինվորական դատախազն իր որոշմամբ մերժել է ձերբակալման միջնորդությունը։ Մերժումն էլ ուղարկել ՔԿ»,– հայտնել է փաստաբանը։
Ինչ վերաբերում է վարչապետ Նիկոլ Փաշինյանին գործով որպես մեղադրյալ ներգրավելու ու հարցաքննելու միջնորդությանը, Վահան Հովհաննիսյանը հայտնել է, որ այն ուղարկվել է ՔԿ զինվորական գլխավոր վարչություն, ներկա պահին գտնվում է այնտեղ, բայց հետաձգված է։
Նշվում է, որ աղմուկն ու փոխադարձ հայհոյանքները հանդիպումից հետո էլ շարունակվեցին մի քանի րոպե։
