Չինաստանի ԱԳՆ-ն հայտարարել է, որ երկիրը շահագրգռված չէ Երրորդ համաշխարհային պատերազմով
Չինաստանի իշխանությունները շահագրգռված չեն երրորդ համաշխարհային պատերազմով և աջակցում են Ուկրաինայի հակամարտության կարգավորմանը դիվանագիտական ճանապարհով։ Այդ մասին երեքշաբթի օրը հայտարարել է Չինաստանի արտաքին գործերի նախարարության խոսնակ Վան Վենբինը։
«Ոչ ոք չի ցանկանում տեսնել երրորդ համաշխարհային պատերազմ, անհրաժեշտ է աջակցել Ռուսաստանի և Ուկրաինայի միջև խաղաղ բանակցությունների առաջխաղացման գործընթացին», - ասել է նա ճեպազրույցում ՝ պատասխանելով լրագրողի հարցին, թե ինչպես է Չինաստանի ԱԳՆ-ն գնահատում Ռուսաստանի արտգործնախարար Սերգեյ Լավրովի վերջին խոսքերը՝ երրորդ համաշխարհային պատերազմի սկսվելու սպառնալիքի մասին։
Վենբինի խոսքով, չպետք է թույլ տալ, որ Ուկրաինայում զինված գործողությունները երկարատև բնույթ ստանան։ Նա մատնանշել է բացասական հետեւանքները կանխելու անհրաժեշտությունը, ինչի արդյունքում ուկրաինական հակամարտությունը կարող է ազդել ոչ միայն Եվրոպայի, այլեւ ողջ աշխարհի վրա։
«Հույս ունենք, որ բոլոր շահագրգիռ կողմերը սառնասրտություն կդրսևորեն և թույլ չեն տա էսկալացիա»,- ամփոփել է ԱԳՆ ներկայացուցիչը։
Վենբինը հավելել է, որ Ավստրալիայի պաշտպանության նախարար Փիթեր Դաթոնի՝ Չինաստանի համեմատությունը նացիստական Գերմանիայի հետ զզվելի է, և որ «խելագար հայտարարությունները» ուղղված են Չինաստանի Ժողովրդավար Հանրապետության նսեմացմանը և պատերազմի խթանմանը։
«Քաղաքական գործիչները խելահեղ հայտարարություններ են անում էգոիստական քաղաքական նպատակներով՝ քարոզելով պատերազմ և զրպարտելով Չինաստանին», - ասել է նա՝ ՏԱՍՍ-ի խնդրանքով մեկնաբանելով Ավստրալիայի պաշտպանության կառույցի ղեկավարի վերջին խոսքերը, ով Չինաստանը համեմատել է «հավակնոտ նացիստական Գերմանիայի հետ»։
