Զելենսկուն Կրեմլում համարու՞մ են Ուկրաինայի օրինական նախագահ․ հարց՝ Պեսկովին
Կրեմլից հայտնել են, որ իրենք Վլադիմիր Զելենսկիին համարում են Ուկրաինայի օրինական նախագահ։
«Այո, նա Ուկրաինայի նախագահն է»,- երեքշաբթի ասել է ՌԴ նախագահի խոսնակ Դմիտրի Պեսկովը։ Այսպիսով, նա պատասխանել է լրագրողների այն հարցին, թե արդյոք Կրեմլը շարունակում է Զելենսկիին համարել Ուկրաինայի օրինական նախագահ։ Այս մասին գրում է Ինտերֆաքսը։
Պեսկովի խոսքով՝ Ուկրաինայի նախագահը կարող է հրաման տալ (Ուկրաինայի զորքերին) վայր դնել զենքերը, և այդ ժամանակ զոհեր չեն լինի։
Կրեմլի ներկայացուցչին խնդրել են պատասխանել հարցին՝ ըստ Կրեմլի՝ Կիևն այժմ գտնվու՞մ է նացիստական ուժերի հսկողության տակ։
ՌԴ նախագահի մամուլի քարտուղարը պատասխանել է. «Այս հարցին չեմ կարող պատասխանել, պետք է կապ հաստատել ՊՆ հետ, տեղում իրավիճակին տեղյակ չեմ»։
Պեսկովը նաև նշել է, որ ռուս-ուկրաինական բանակցությունների առաջին փուլից հետո Ռուսաստանի և Ուկրաինայի նախագահների շփումները դեռևս նախատեսված չեն։
Բանակցությունների առաջին փուլը տեղի է ունեցել նախօրեին և տևել է մոտ հինգ ժամ։ Ռուսական պատվիրակության ղեկավար, նախագահի օգնական Վլադիմիր Մեդինսկին հանդիպումից հետո ասել է, որ երկու երկրների ներկայացուցիչները խորհրդակցություններ կանցկացնեն ղեկավարության հետ, որից հետո բանակցությունները կշարունակվեն։
