ԱՄՆ-ն նախազգուշացրել է Ռուսաստանում հնարավոր ահաբեկչությունների մասին. Զախարովան արձագանքել է
Մոսկվայում ԱՄՆ դեսպանատունը հանդես է եկել Ռուսաստանում հնարավոր ահաբեկչությունների մասին ամերիկացիների համար նախազգուշացմամբ: Այս մասին հայտնում է ТАСС-ը:
«Ըստ ԶԼՄ-ների հաղորդագրությունների՝ հարձակումների վտանգ կա առևտրի կենտրոններում, երկաթուղային և մետրոյի կայարաններում և այլ մարդաշատ վայրերում խոշոր քաղաքներում, այդ թվում՝ Մոսկվայում և Սանկտ Պետերբուրգում, ինչպես նաև Ուկրաինայի հետ Ռուսաստանի սահմանի երկայնքով գտնվող տարածքներում»,- ասվում է տեքստում։
Միաժամանակ, դեսպանատունը չի տրամադրում կոնկրետ հրապարակումների հղումներ, որոնց հիման վրա եզրակացություններ են արվել Ռուսաստանի Դաշնությունում ահաբեկչությունների հնարավորության մասին։
Հաղորդագրությանն արձագանքել է ՌԴ ԱԳՆ պաշտոնական ներկայացուցիչ Մարիա Զախարովան.
«Հարց Մոսկվայում ԱՄՆ դեսպանատանը՝ իսկ համապատասխան տվյալները գործընկերային ալիքներով փոխանցե՞լ եք ձեր ռուս կոլեգաներին: Եթե ոչ, ինչպե՞ս կարելի է սա հասկանալ»,- գրել է նա թելեգրամյան իր ալիքում:
