«Մենք առաջին իսկ օրվանից դեմ ենք եղել Ղրիմի օկուպացմանը». Թուրքիայի ՊՆ

«Թուրքիան բոլոր ջանքերը գործադրում է սևծովյան տարածաշրջանում լարվածությունը թուլացնելու համար։ Տարածաշրջանում առկա բոլոր տարաձայնությունները պետք է լուծվեն դիվանագիտական ​​և բանակցությունների միջոցով»։ Այս մասին հայտարարել է Թուրքիայի պաշտպանության նախարար Հուլուսի Աքարը, փոխանցում է Anadolu-ն։

Նա նաև ընդգծել է, որ 1936 թվականի նեղուցների կարգավիճակի մասին Մոնտրոյի կոնվենցիայի շնորհիվ Սև ծովում որոշակի ստատուս քվո է ձևավորվել։

«Դրա շնորհիվ սևծովյան տարածաշրջանում պահպանվեց ուժերի հավասարակշռությունը, ապահովվեց անվտանգությունն ու կայունությունը։ Մենք դա հայտարարում ենք ամեն հնարավորության դեպքում, և դա կենսական նշանակություն ունի»,- ասել է Աքարը։

Վերադառնալով ուկրաինառուսական ճգնաժամի թեմային՝ Աքարը նշել է, որ Թուրքիան ամենաբարձր մակարդակով առաջին իսկ օրվանից հայտնել է իր հստակ դիրքորոշումն այս հարցում։

«Մենք առաջին իսկ օրվանից դեմ ենք եղել Ղրիմի օկուպացմանը։ Մենք նաև ասել ենք, որ աջակցում ենք Ուկրաինայի տարածքային ամբողջականությանը և շարունակում ենք մնալ մեր դիրքերում։ Մենք հանդես ենք գալիս ողջախոհության և տարածաշրջանում լարվածության կարգավորման հավասարակշռված մոտեցման օգտին, և այս առումով մենք անկեղծորեն ցանկանում ենք, որ սևծովյան տարածաշրջանի երկրները լինեն խաղաղության, երկխոսության, հանգստության և բարգավաճման մեջ»,- ասել է Աքարը։

Աքարն ընդգծել է, որ Թուրքիան դեմ է Սև ծովում լարվածության հետագա սրմանը։

Նախարարը հիշեցրել է, որ Թուրքիան Սև ծովում ամենաերկար ափն ունեցող երկիրն է և բոլոր կողմերին հանգստության, համագործակցության, խորհրդակցությունների և երկխոսության կոչ է արել։