Անհապաղ լքել Ուկրաինան․ Ճապոնիայի ԱԳՆ-ն` իր քաղաքացիներին
Ճապոնիայի արտաքին գործերի նախարար Յոշիմասա Հայաշին երկուշաբթի օրը հորդորել է հայրենակիցներին հնարավորինս շուտ լքել Ուկրաինան։ «Մենք պետք է անհապաղ տարհանվենք հնարավորինս անվտանգ եղանակով»,- լրագրողների հետ զրույցում այս մասին հայտարարել է նախարարը։ Այս մասին գրում է ТАСС-ը:
«Իրավիճակը կարգավորելու համար դիվանագիտական ջանքերը շարունակվում են, սակայն, իրավիճակը կարող է կտրուկ վատթարանալ»:
Ճապոնիայի ԱԳՆ-ն արդեն էլեկտրոնային փոստով կապ է հաստատում Ուկրաինայում գտնվող հայրենակիցների հետ և կոչ արել անհապաղ լքել երկիրը։
Նախարարությունը նաև հայտնել է, որ Կիևում Ճապոնիայի դեսպանատան տարածքում մնացել են սակավաթիվ աշխատակիցներ։ Դեռևս ուրբաթ օրը Ճապոնիայի ԱԳՆ-ն կոչ էր արել երկրի քաղաքացիներին անհապաղ լքել Ուկրաինայի տարածքը։ ԱԳՆ-ն այս որոշումը բացատրել էր «ուկրաինա-ռուսական սահմանին լարվածության շարունակական աճով»։ Ճապոնիայի ԱԳՆ-ն ընդգծել է, որ իրավիճակի հետագա զարգացումը մնում է «անկանխատեսելի՝ չնայած շարունակվող դիվանագիտական ջանքերին», որոնք ուղղված են ճգնաժամի կարգավորմանը։
