ԱՄՆ-ն հարցեր ունի՝ ՀԱՊԿ-ի ուժերի տեղակայմանն ուղղված Ղազախստանի հարցման օրինականության մասին. Սպիտակ տուն

 Միացյալ Նահանգները տեղյակ չեն, թե արդյոք Ղազախստանի իշխանությունների հարցումը՝ երկրում Հավաքական անվտանգության պայմանագրի կազմակերպության (ՀԱՊԿ) ուժերի տեղակայման վերաբերյալ, օրինական էր, թե ոչ: Այս մասին հայտարարել Է Սպիտակ տան մամուլի քարտուղար Ջեն Պսակին՝ լրագրողների համար ճեպազրույցի ժամանակ։

«Մենք ուշադիր հետեւում ենք հաղորդագրություններին այն մասին, որ Հավաքական անվտանգության պայմանագրի կազմակերպությունն իր հավաքական խաղաղապահ ուժերն ուղարկել է Ղազախստան։ Մենք հարցեր ունենք այդ հարցման բնույթի մասին, թե արդյոք դա օրինական հրավեր էր, թե ոչ։ Այս պահին մենք դա չգիտենք», - ասել է Պսակին՝ կոչ անելով ՀԱՊԿ ուժերին և իրավապահ մարմիններին կատարել Մարդու իրավունքների ոլորտում միջազգային պարտավորությունները։

Սպիտակ տանը նշել են, որ ՀԱՊԿ-ի՝ Ղազախստան խաղաղապահ ուժեր ուղարկելը չի ազդել ԱՄՆ-ի եւ ՌԴ-ի անվտանգության շուրջ բանակցությունների անցկացման ծրագրերի վրա: