Իրանի նախագահը վերահաստատել է իր աջակցությունը Հայաստանին

Իրանի և Հայաստանի համագործակցությունը և տնտեսական հարաբերությունների խթանումը կծառայի բոլոր կողմերի շահերին և կնպաստի տարածաշրջանային անվտանգությանը: Այս մասին հայտարարել է Իրանի նախագահ Էբրահիմ Ռայիսին, հաղորդում է Tasnim-ը։

Երկուշաբթի օրը Հայաստանի վարչապետ Նիկոլ Փաշինյանի հետ հեռախոսազրույցում Ռայիսին ընդգծել է երկու երկրների միջև տնտեսական և առևտրային կապերի զարգացման անհրաժեշտությունը։

«Թեհրանի և Երևանի միջև համագործակցության և տնտեսական փոխանակումների ընդլայնումը կբավարարի բոլոր կողմերի շահերը և միանշանակ կնպաստի անվտանգությանը»,- ասել է Իրանի նախագահը։

Նա նաև խոսել է Հարավային Կովկասում տիրող նուրբ իրավիճակի մասին՝ ասելով. «Իրանի Իսլամական Հանրապետությունը սկզբունքային քաղաքականությունն է ՝ աջակցել երկրների տարածքային ամբողջականությանը և ինքնիշխանությանը»։

Իրանի նախագահը վերահաստատել է իր աջակցությունը Հայաստանին՝ իր տարածքների և ճանապարհների նկատմամբ ինքնիշխանության պահպանման հարցում, Ռայիսին ողջունել է նաև Հայաստանի և Ադրբեջանի միջև բանակցություններում առաջընթացը։

«Մենք հուսով ենք, որ երկու երկրների միջև մյուս խնդիրները նույնպես խաղաղ ճանապարհով կլուծվեն՝ միջազգային սկզբունքների և օրենքների շրջանակներում, իսկ մենք տարածաշրջանում խաղաղության, կայունության և անվտանգության ականատեսը կդառնանք»,- հավելել է նա։