Նոր ռեկորդ. Ֆրանսիայում որսացել են ամենամեծ ոստրեն

Ֆրանսիայում` Կարանտեկ Կոմունայի ափերին աշխարհում ամենամեծ ոստրեն են որսացել:
Այս մասին հայտնում է ՏԱՍՍ գործակալությունը՝ հղում անելով տեղի աղբյուրին:

Ոստրեի զանգվածը 2230 գրամ է: Ոստրեի խեցու չափսերը հետևյալն են` 26.5 սմ երկարություն, 13 սմ լայնություն և 10 սմ հաստություն: Այն մի քանի տասնյակ գրամով ավելի ծանր է նախորդ ռեկորդակրից, որը նույնպես այդ լողափում էր հայտնաբերվել: 
Հսկային որսած Les Huitres de Pen al Lann ընկերությունը կարծում է, որ ոստրեն մոտ 15 տարեկան էր: Ընկերության ներկայացուցիչը հայտնել է, որ այս տարի կարողացել է մի քանի նմուշ որսալ, որոնց քաշը գերազանցում է մեկ կգ-ը:

Ընկերության ներկայացուցչի խոսքով՝  ոստրեն ուտելի է: Այն Սուրբ Ծնունդի համար ձեռք է բերել տեղի հաստատություններից մեկը, սակայն վաճառքի գինը չի հաղորդվում: 

Մասնագետների խոսքով` խեցին բացելու համար ոստրեի համար նախատեսված սովորական դանակը չի բավարարի: Վերջիններս խորհուրդ են տվել մուրճ օգտագործել կամ պարզապես եփել այն վառարանում, որն ավելի անվտանգ է: