Հաջողվեց մուտք գործել համայնքապետարան. Փարաքարում ակցիան ավարտվեց

Մեծ ջանքեր գործադրելուց հետո Վոլոդյա Գրիգորյանին վերջապես հաջողվեց մուտք գործել համայնքապետարան: Նա կոչ արեց բողոքի ակցիա իրականացնողներին, որ ավարտեն այն և գնան տուն.

«Ամեն ինչ նորմալ է, որևէ խնդիր չկա, ամեն մեկս գնում ենք տուն»,- ասաց նա՝ ընդգծելով, որ իրենք իրենց աշխատանքը կիրականացնեն Փարաքարի համայնքապետարանում, իսկ իրավական մասով կզբաղվի արդեն դատարանը:

Հիշեցնենք, որ արդեն քանի օր է, ինչ Փարաքարում լարված իրավիճակ է: Բանն այն է, որ դեկտեմբերի 20-ին տեղի ունեցած ավագանու անդրանիկ նիստից հետո «Դավիթ Մինասյան» դաշինքի համայնքապետի թեկնածու Դավիթ Մինասյանը և «Ապրելու երկիր» կուսակցության թեկնածու Վոլոդյա Գրիգորյանը ֆեյսբուքյան իրենց էջերում հայտարարել էին, որ ընտրվել են համայնքի ղեկավարներ:

«Ապրելու երկիր» կուսակցությունը 21 հոգանոց ավագանիում ստացել է 10 մանդատ եւ 10 ձայնով իրենց թեկնածուն՝ Վոլոդյա Գրիգորյանը ընտրվել է համայնքի ղեկավար: Թեեւ 10 ձայնը 50 տոկոսից քիչ է, սակայն «Ապրելու երկիր» կուսակցությունը պնդում է, որ եթե առաջադրված է մեկ թեկնածու, ապա նա կարող է ընտրվել 40+ տոկոս ձայներով: Դրանից հետո եկել ավագանու 11 ձայներով համայնքապետ էր ընտրվել Դավիթ Մինասյանը, որը «Դավիթ Մինասյան» դաշինքի թեկնածուն է: Նրան էին ընտրել նաեւ ՔՊ-ի անդամները: