Արցախում իջեցնու՞մ են հայկական դրոշները. ԱՀ նախագահի խոսնակը մեկնաբանում է

Yerevan.today-ին հասած տեղեկություններով Արցախում հայ-ադրբեջանական շփման գծի ԱՀ ՊԲ մարտական դիրքերից իջեցվել են հայկական դրոշները (թե Արցախի Հանրապետության, թե Հայաստանի Հանրապետության)։ Տեղեկությունը ստուգելու համար arcakh24.info լրատվական կայքի թիմի անդամներն ուսումնասիրել են Շուշի քաղաքի հարակից հայկական մարտական դիրքերը, ինչի արդյունքում հաստատվել է, որ հայկական դրոշները բացակայում են նշված մարտական դիրքերից։

Որոշ տեղեկություններով նոյեմբերի 26-ին Սոչիում կայացած հանդիպումից հետո ադրբեջանական կողմը դրոշներն իջեցնելու պայման էր դրել` այլապես սպառնալով կրակ բացել հայկական դիրքերի ուղղությամբ։

Auroranews-ը կապ հաստատեց ԱՀ նախագահի խոսնակ Լուսինե Ավանեսյանի հետ, որը մեզ հետ զրույցում ասաց. 

«Եկեք  Ստեփանակերտ և ձեր աչքով տեսեք և՛ դրոշները, և՛ մնացածը, ես չեմ կարող մեկնաբանել մի բան, որը գոյություն չունի» ,-ասաց նախագահի խոսնակը՝ նշելով, որ նման տեղեկություն չունի: 

Մենք փորձեցինք կապ հաստատել նաև ԱՀ ՊԲ, սակայն մեր զանգերն անպատասխան մնացին: