ՏԵՍԱՆՅՈՒԹ. Նիկոլ Փաշինյանը ՊՆ նախարարին հուշու՞մ էր, թե ինչ պատասխանի

Ազգային ժողովի «Հայաստան» խմբակցության պատգամավոր Աղվան Վարդանյանը կարդաց կալանավորված պատգամավորների, Սյունիքի համայնքապետերի անունները:

«Արմեն Չարչյան, Առուշ Առուշանյան, Մխիթար Զաքարյան, Արթուր Սարգսյան, Մանվել Փարամազյան, Մենուա Հովսեփյան, Աշոտ Մինասյան. այս մարդիկ կալանավայրում են, Արմեն Չարչյանը հազարավոր մարդկանց առողջություն է պարգևել, հարյուրավոր զինվորների վիրահատել, այս Ազգային ժողովի պատգամավոր է: Առուշ Առուշանյանին Գորիսը երկու անգամ քաղաքապետ է ընտրել, բանտում էլ է հաղթել, Արթուր Սարգսյանը, Մխիթար Զաքարյանը նույնպես պատգամավոր են, նույնպես Սյունիքի քաղաքապետեր, Մանվել Փարամազյան՝ Քաջարանի քաղաքապետ, Մենուա Հովսեփյան՝ Գորիսի փոխքաղաքապետ, Աշոտ Մինասյան՝ «Սիսական ջոկատի» հրամանատար, երեք պատերազի մասնակից: Պարզ հարց՝ ո՞ր դեպքում Սյունիքն ավելի պաշտպանված կլիներ, եթե այս մարդիկ իրենց տեղում լինեի՞ն, թե՞ բանտում», - հետաքրքրվեց Վարդանյանը:

Նա ասաց, թե իր հարցի պատասխանն անկկալում է լսել Պաշտպանության պարկեշտ նախարարից:

«Շնորհակալ եմ ջերմ խոսքերի համար, այնուամենայնիվ, անկեղծ ասած՝ չգիտեմ՝ Պաշտպանության նախարարի որ իրավասության տիրույթում է գտնվում խոսել դատաիրավական համակարգի կատարած աշխատանքի մասին: Ես կարծում եմ, որ Հայաստանի Հանրապետությունը յուրաքանչյուր հատվածում ավելի պաշտպանված կլիներ, եթե յուրանքանչյուր դերակատար իր պարտականությունները կատարեր հավուր պատշաճի, այդ թվում, նաև քիչ թալաներ», - ասաց Պաշտպանության նախարար Սուրեն Պապիկյանը:

Աղվան Վարդանյանն էլ արձագանքեց. «Երբ որ ես ասում էի պարկեշտ նախարար, իմ տեղեկացվածությունը այդպիսին է ձեր մասին, ես ձեզ հարց չէի տալիս դատական համակարգի մասին, պարզ հարց էի տալիս ու կարծում էի՝ պարկեշտությունն այնքան կարևոր հատկություն է, որ այդ պարզ հարցին պատասխանելու համար ուրիշ մեկի հուշարարության կարիք չպիտի ունենաք»:

Նշենք՝ մինչ Պապիկյանը կպատասխաներ Աղվան Վարդանյանի հարցին, վարչապետ Նիկոլ Փաշինյանը նրան հուշում էր, թե ինչ պատասխանի:

Սուրեն Պապիկյան էլ հայտարարեց, թե Սյունիքն ավելի պաշտպանված կլինի ու կդառնա, երբ կատարեն իրենց պարտականությունները: