Գերությունից վերադարձած Հարութի հարազատները որդուն դեռ չեն տեսակցել. նա բազմազավակ հայր է
Ռուսական կողմի միջնորդությամբ դեկտեմբերի 4-ին Հայաստան է վերադարձել 10 հայ գերի, որոնք Ադրբեջանի կողմից գերեվարվել էին նոյեմբերի 16-ին՝ ՀՀ ինքնիշխան տարածքից։ Հայրենիք վերադարձած զինծառայողներից հինգը Վանաձորից են, երկուսը՝ Գյումրիից, մեկը՝ Բյուրեղավանից։ Մյուս երկուսը ժամկետային զինծառայողներ են՝ Աբովյանից։
Վերադարձածների թվում է ծնունդով Դեբետից, 32-ամյա Հարութ Արամայիսի Սարգսյանը։ Նրա գերեվարման մասին ավելի վաղ հատնել էր Դեբետի համայնքապետը։ Լոռու մարզի Դեբետ համայնքի ղեկավար Աշոտ Ղազարյանը «Փաստինֆո»-ի հետ զրույցում տեղեկացրեց, որ Հարութը բնակվում էր Վանաձորում ու բազմազավակ հայր է։
«Նա ծնունդով Դեբետից է, բնակվում է Վանաձորում։ Պաշտոնապես հաստատվել է նրա վերադարձը։ Հարություն Արամայիսի Սարգսյանը Դեբետի միջնակարգ դպրոցում է ուսումը ստացել։ Ժամկետային զինծառայությունն անցել է, ամուսնացել, մանկահասակ երեխաներ ունի՝ բազմազավակ հայր է»։
Համայնքապետի տեղեկություններով՝ Հարութի հարազատները որդուն դեռ չեն տեսակցել։ Նշենք, որ վերադարձած 10 զինծառայողները օդանավակայանից տեղափոխել են բժշկական հաստատություններ՝ բուժզննում անցնելու։
«Գյուղից մի քանի հոգով իրենց տուն գնացինք, հասանք Վանաձոր, զանգահարեցինք, հայրը ասաց՝ շտապ մեկնում են Երևան՝ հանդիպելու իրենց տղային։ Հետ են վերադարձել ու հասկանալի պատճառներով դեռ չեն տեսել։ Երեկվա դրությամբ չեն կարողացել տեսակցել»։
Նոյեմբերի 16-ին գերեվարված զինծառայողների թվում նաև Դեբետում բնակվող քաղաքացի կա, սակայն վերադարձածների թվում նա չի եղել։ Դիտարկմանը, որ հնարավո՞ր է նոր գերիների վերադարձ լինի, համայնքապետը նշեց, որ հույս ունեն՝ կկարդան նաև նրա անունը։
«Մենք էլ ենք սպասում ու հույս ունենք, որ հաստատված գերիների ցուցակում կկարդանք մեր համագյուղացու անունը, նրա՝ գերության մասին տեղեկություններ չկան։ Տա աստված, որ բոլորը ողջ, առողջ վերադառնան, մնացածի պես իրենք իրենց ոտքով՝ հստակ քայլերով ինքնաթիռից իջնեն իրենց հայրենի հողը ու նաև արժանան ուշադրության»։
Ղազարյանից փորձեցինք հասկանալ, թե ի՞նչ է, ի վերջո, հայտնի նոյեմբերի 16-ին տեղի ունեցած ագրեսիայից, որի հետևանքով նահատակվեց նաև Դեբետի բնակիչներից մեկը։
«Ես չեմ տիրապետում այն տեղանքին ու դրա առանձնահատկություններին, որտեղ տեղի են ունեցել գործողությունները, չեմ զրուցել ոչ մեկի հետ, ովքեր տեղանքում են եղել։ Հետևաբար` միայն գուգլի քարտեզում տեղանքը պատկերացնելով՝ չեմ կարող հասկանալ, մինչև տղաները չգան, չզրուցեմ։ Ինչքան էլ լսել եմ պատմությունները, բոլորը աբսուրդային են։ Կգան, կխոսենք, կհասկանանք, թե ոնց է տեղի ունեցել, հիմա կարևոր է, որ տղաները ողջ, առողջ վերադառնան, հասնեն իրենց ընտանիքներին ու երեխաներին ու այլևս նման դեպքեր տեղի չունենան»,- եզրափակեց Ղազարյանը։
Նշենք, որ մինչև այս պահը հայտնի չէ, թե, ի վերջո, Բաքվում քանի՞ զինծառայող է գերեվարված եղել նոյեմբերի 16-ի ադրբեջանական ագրեսիայի հետևանքով։ Ըստ վարչապետի՝ 32 զինծառայող էր գերեվարվել, նրանցից մեկը, որը վիրավոր էր, վերադարձել էր ավելի վաղ, իսկ 10-ը՝ վերադարձան դեկտեմբերի 4-ին։ Փաստացի, Բաքվում շարունակում է մնալ 21 զինծառայող։
