Պարզ չէ, թե պատվաստանյութերի ազդեցությունն ինչպիսին կլինի. Փաշինյանը՝ «օմիկրոն» շտամի մասին

Կորոնավիրուսային համաճարակի հետ կապված ունենք դրության որոշակի մեղմացում, բայց սա որևէ բան չի նշանակում, քանի որ նոր շտամ է հայտնաբերվել։ Կառավարության նիստի մեկնարկին այս մասին ասաց ՀՀ վարչապետ Նիկոլ Փաշինյանը։

«Օմիկրոն շտամը դեռևս Հայաստանում չի հայտնաբերվել, բայց դեռ հստակ չէ, թե այս շտամն ինչ ազդեցություններ կարող է ունենալ և վարակվածներն ինչ ծանրությամբ կտանեն հիվանդությունը։ Պարզ չէ նաև, թե պատվաստանյութերի ազդեցությունն ինչպիսին կլինի, հետևաբար առաջիկայում չպետք է թուլացնենք մեր զգոնությունը մինչև նոր շտամի հետ կապված իրադրությունը լավանա»,-նշեց Նիկոլ Փաշինյանը։

Վարչապետը նաև նշեց, որ պատվաստման գործընթացի հետ կապված արդեն շոշափելի թիվ ունենք։ Երկրորդ դեղաչափը ստացած քաղաքացիների թիվն արդեն մոտենում է 500 հազարին։ Նրա խոսքով ոչ աշխատանքային օրերից բացի օրական հաջողվում է 20 հազարից ավել պատվաստում իրականացնել։

ՀՀ առողջապահության նախարար Անահիտ Ավանեսյանն էլ նշեց, որ եթե անգամ նոր շտամի հայտնաբերման պատճառով պատվաստանյութերի արդյունավետության որոշակի նվազում լինի, միևնույն է հիվանդության ծանր ընթացքով և մահվան դեպքերի առումով նախարարի խոսքով պատվաստումները շարունակում են մնալ ամենաարդյունավետ և միակ միջոցը՝ հիվանդության դեմ պայքարելու։

«Վիճակագրական տվյալները ցույց են տալիս, որ անգամ պատվաստանյութերի արդյունավետության որոշակի նվազման դեպքում, միևնույն է, դրանք փրկում են մարդկանց կյանքը»,-ասաց Անահիտ Ավանեսյանը։