Իշխանությունը օրենսդրական փոփոխությամբ որոշել է լուծել Ղազինյանի առաջադրման հարցը. ի՞նչ է անելու ընդդիմությունը. ArmDaily

Ինչպես հայտնի է, ԱԺ «Քաղաքացիական պայմանագիր» խմբակցությունը առաջարկում է Ազգային ժողովի կանոնակարգում փոփոխություն անել, ըստ որի՝ եթե ընդդիմադիր խմբակցությունը հանձնաժողովի փոխնախագահի համար առաջադրել է իր թեկնածուին, ով չի ընտրվում մեկ անգամ, ապա պետք է առաջադրի այլ թեկնածու։ Ըստ առաջարկվող փոփոխության՝ եթե ընդդիմության երկրորդ թեկնածուն էլ չընտրվի ապա իշխանությունն է առաջադրում իր «պակաս անցանկալի» թեկնածուին։ Նախագծի նպատակը Արթուր Ղազինյանի՝ արդեն 14-րդ անգամ պաշտպանության և անվտանգության հարցերով մշտական հանձնաժողովի փոխնախագահ չընտրվելու հարցը լուծելն է։ Ինչպես հայտնի է՝ Ղազինյանի թեկնածությունը անընդունելի է իշխող քաղաքական մեծամասնության համար, իսկ խորհրդարանական ընդդիմությունն էլ անդրդվելի է, չի պատրաստվում փոխել իր թեկնածուին։ ՔՊ-ական պատգամավոր Վահագն Ալեքսանյանը հայտարարել է, որ իրենք չունեն ցանկալի թեկնածուներ, բայց ունեն պակաս անցանկալի թեկնածուներ։

ArmDaily.am-ը կապ հաստատեց ԱԺ պաշտպանության և անվտանգության հարցերով մշտական հանձնաժողովի անդամ, «Հայաստան» խմբակցության պատգամավոր Գեղամ Մանուկյանի հետ՝ պարզելու, թե ինչ է պատրաստվում անել ընդդիմությունը։

«Այդ մասին նրանք վաղուց էին հայտարարել, սա արդեն սովորական աշխատաձև է ցանկացած օրենք, օրենքի կետ, որոնք խանգարում են այս իշխանությանը անօրինականություններ գործել, նրանք շատ արագ փոփոխում են օրենքները, դրանց բազմաթիվ օրինակներ կան»,- նշել է Գեղամ Մանուկյանը։

Հարցին, թե ինչ է անելու ընդդիմությունը, եթե օրենքում փոփոխություն արվի՝ Մանուկյանը պատասխանեց. «Հարց է, թե իրենք ինչ են պատրաստվում  անել, օրենքը կփոխեն հետո կերևա՝ ինչ են պատրաստվում անել»։