«Ես հայ ժողովրդի կողքին եմ, Ադրբեջանը պետք է ճանաչի ու հարգի Հայաստանի ինքնիշխանությունը». ԱՄՆ կոնգրեսական

ԱՄՆ Կոնգրեսի Ներկայացուցիչների պալատի անդամ Քեթրին Քլարկը հորդորել է Ադրբեջանին հարգել Հայաստանի ինքնիշխանությունը։

«Ես կանգնած եմ հայ ժողովրդի կողքին, որը հերթական անգամ ենթարկվել է չհրահրված հարձակման: Ադրբեջանը պետք է ճանաչի ու հարգի Հայաստանի ինքնիշխանությունը: Դատապարտում եմ ագրեսիայի այս վերջին գործողությունն ու հորդորում այդ երկրի կառավարությանը հավատարիմ մնալ անցյալ տարվա խաղաղության համաձայնագրին», - «Թվիթեր»-ի իր միկրոբլոգում գրել է կոնգրեսականը:

Հիշեցնենք՝ նոյեմբերի 16-ին ադրբեջանական ԶՈՒ ստորաբաժանումները հերթական սադրանքն են նախաձեռնել ՀՀ արևելյան սահմանագոտու ուղղությամբ: Հակառակորդը կիրառել է հրետանային միջոցներ, զրահատեխնիկա և տարբեր տրամաչափի հրաձգային զինատեսակներ։ 

 Ծավալված մարտերի հետևանքով հայկական կողմն, այս պահի տվյալներով, ունի 6 զոհ։