«Մեր թեկնածուների նկատմամբ փորձում են ճնշումներ իրականացնել, որ քարոզարշավի չմասնակցեն». Դավիթ Համբարձումյան
Մասիսում ավագանու ընտրություններին առաջադրված «Դավիթ Համբարձումյան» դաշինքի ավագանու թեկնածուների նկատմամբ ճնշումներ են իրականացվում։ Այս մասին NEWS.am-ի հետ զրույցում ասաց Մասիս համայնքի նախկին ղեկավար Դավիթ Համբարձումյանը, որը գլխավորում է դաշինքը։
«Մեր թեկնածուների նկատմամբ փորձում են ճնշումներ իրականացնել, որ քարոզարշավի չմասնակցեն, բայց, միեւնույն է, չեմ կարծում, որ դա իրենց մոտ կստացվի»,- նշեց նա։
Հարցին, թե ճնշումների արդյունքում եղել են ավագանու թեկնածուներ, որոնք հրաժարվել են թեկնածությունից, Համբարձումյանն ասաց, որ նման 1-2 դեպք է եղել։
«Մենք ենք իրենց հորդորել, որ դուրս գան ցուցակից, որպեսզի մարդկանց ու իրենց երեխաներին գործից չհանեն»,- ընդգծեց Համբարձումյանը:
Մասիսի արդեն նախկին համայնքապետ Համբարձումյանի պաշտոնավարման ժամկետը լրացել է նոյեմբերի 14-ին։ Երեկ՝ նոյեմբերի 17-ին, Նիկոլ Փաշինյանի որոշմամբ՝ Մասիս համայնքի ղեկավարի ժամանակավոր պաշտոնակատար է նշանակվել Սայեն Հայրապետյանը։ Սայեն Հայրապետյանն իշխող «Քաղաքացիական պայմանագիր» կուսակցության համայնքապետի թեկնածուն է։
Դավիթ Համբարձումյանը չբացառեց, որ հնարավոր է դա արվել է ընտրությունների ընթացքում վարչական ռեսուրսներ օգտագործելու նպատակով։
«Ակնհայտ երեւում է, որ այդ գործելաոճն են ընտրել, բայց չեմ կարծում, որ հաջողություն կունենան»,- ասաց Դավիթ Համբարձումյանը։
Հավելենք, որ դեկտեմբերի 5-ին Մասիսում կայանալիք ընտրություններում մասնակցելու են միայն «Քաղաքացիական պայմանագիր» կուսակցությունը եւ «Դավիթ Համբարձումյան» դաշինքը։
