Իրանի ԱԳ նախարարը խոսել է երկրի արտաքին դիվանագիտության մանրամասներից
Իրանի արտաքին գործերի նախարար Հոսեյն Ամիրաբդոլլահիանն ընդգծել է, որ Իսլամական Հանրապետության դիվանագիտական ապարատը երկրի և Իրանի ժողովրդի ճակատագիրը չի կապելու 2015 թվականի միջուկային համաձայնագրի կամ որևէ օտար պետության հետ, քանի որ փոխգործակցության չափանիշ են համարվում ընդհանուր շահերը, գրում է ԻՌՆԱ գործակալությունը։
Իրանցի բարձրաստիճան դիվանագետը հայտարարել է, որ Թեհրանը ստեղծել է վեհ մեխանիզմ՝ հետամուտ լինելու տարածաշրջանային համագործակցության կարգախոսի իրականացմանը՝ հավելելով, որ Իսլամական Հանրապետությունը կկանգնի Միացյալ Նահանգների իրանատյաց քարոզչական արշավի դեմ։
Նա շարունակել է՝ ասելով, որ նախագահ Էբրահիմ Ռայիսիի վարչակազմը նախանշել է արտաքին քաղաքականության որոշ հիմնաբառեր, այդ թվում՝ հավասարակշռված արտաքին քաղաքականություն, ինչպես նաև ակտիվ, խելացի և դինամիկ դիվանագիտություն:
Իսլամական Հանրապետությունը կարևորում է հարևան պետությունների և Ասիայի երկրների հետ հարաբերությունները, ասել է նա՝ հավելելով, որ Թեհրանը դինամիկ դիվանագիտություն է վարելու Եվրոպայի հարցում՝ ընդգծելով, որ Լատինական Ամերիկան և Աֆրիկան չեն մոռացվի։
Ինչ վերաբերում է հավասարակշռությանը, ապա նա նշել է, որ Թեհրանի 13-րդ վարչակազմը ձգտում է հավասարակշռություն պահպանել Արևելքի և Արևմուտքի հետ հարաբերություններում՝ ընդգծելով, որ Իսլամական Հանրապետությունն իր արտաքին քաղաքական բոլոր հարցերը չի կապելու Չինաստանի և Ռուսաստանի հետ, մինչդեռ առաջնահերթություն է տալու Ասիա ուղղված արտաքին քաղաքականությանը:
Իսլամական Հանրապետությունն անկախությունը պահպանելու հարցում հավատարիմ է իր «Չկա Արևելք, չկա՝ Արևմուտք» կարգախոսին, երբ խոսքը վերաբերում է արտաքին ուժերի հետ գործ ունենալուն, նշել է նա։
